Mat­vara hækkar með rykk eftir tveggja mánaða lækkun

Í fréttatilkynningu þess efnis frá verðlagseftirliti Alþýðusambands Íslands. Þar segir að aðrir flokkar hækki þó meira, til að mynda súkkulaði, sem hækki mest hjá Nóa Síríus, en kjötið vegi þyngst í mælingunni.

„Þetta er fyrsti mánuðurinn frá því í mars þar sem verðlagseftirlitið mælir ekki lækkun verðlags í neinni verslun milli mánaða.“

Goði og SS hækka mest

Í tilkynningu segir að verðlagseftirlitið hafi greint frá því nýverið að verð á vörum SS hafi víða hækkað fyrir tveimur vikum. Vörur frá Goða hafi einnig hækkað, en lítilla breytinga verði vart á verði Ali og Stjörnugríss, þar sem verð lækki í Nettó.

Þá hafi súkkulaðiverð hækkað mikið á árinu og hækkunin haldi áfram þennan mánuðinn hjá Nóa Síríus og Freyju. Langmesta hækkunin sé á vörum frá Nóa Síríus í Bónus. Í Nettó lækki meðalverðið á vörum allra framleiðenda nema Nóa Síríus.

Prís enn ódýrast

Prís sé enn ódýrasta matvöruverslunin sem verðlagseftirlitið skoðar reglulega, en verð þar sé að meðaltali 0,8 prósent hærra en þar sem það er lægst. Bónus sé nú að meðaltali 3,42 prósent yfir lægsta verði og Krónan 4,30 prósent.

Þá segir að verslanir Samkaupa, Nettó, Kjörbúðin, Krambúðin og Iceland hafi verið á miklu ferðalagi í verðlagningu síðan í sumar. Verð þar hafi hækkað verulega í júlí og lækkað svo um munaði í ágúst, sem hafi átt nokkurn þátt í sveiflum verðlagsvísitölu matvöru þá mánuði.

„Nettó-breytingin, ef svo má segja, er að röðun verslana á matvörumarkaði er nú önnur en áður. Nettó, sem áður var tíðum um 12% yfir lægsta verði, eða 11% hærra en Bónus, er nú 6,4% yfir lægsta verði að meðaltali – aðeins um 3% yfir Bónus. Fjarðarkaup, sem áður voru rétt undir Nettó, eru nú 14,7% yfir lægsta verði að meðaltali. Kjörbúðin hefur einnig færst til og er nú að jafnaði ódýrari en Extra, öfugt við það sem áður var. Hins vegar hafa Iceland og Krambúðin tekið kipp og eru nú sjónarmun lengra frá lægsta verði en þær voru fyrir verðhækkanir og -lækkanir í sumar.“

Gamla krónumynstrið sést aftur

Loks segir að sjá megi að verð í Nettó sé orðið það sama og í Krónunni á mörgum vörum. Þegar 1363 vörur hafi verið skoðaðar, sem finna megi í bæði Nettó og Krónunni, hafi 939, eða 69 prósent, verið á sama verði.

„Þegar skoðaðar eru vörur sem fundust í Nettó, Bónus og Krónunni er gamalt mynstur sjáanlegt: Krónan er einni krónu dýrari en Bónus í 556 tilfellum af 617, eða í 90% tilfella. Nýlundan er að Nettó er nú líka einni krónu dýrari en Bónus í 72% tilfella. Nettó og Krónan voru á sama verði í 79% tilfella í þessum síðari samanburði.“