Ómar og Gísli frá­bærir í stór­leiknum

Ómar var markahæsti maður Magdeburg í leiknum með tíu mörk, en liðið fagnaði dýrmætum og öflugum 29-27 sigri. Sex af mörkum Ómars komu af vítalínunni þar sem hann var öryggið uppmálað og nýtti öll nema eitt af vítum sínum.

Gísli Þorgeir Kristjánsson var einnig öflugur og skoraði fjögur mörk og átti fimm stoðsendingar, eða flestar allra á vellinum.

Magdeburg komst í 17-13 í fyrri hálfleik en Flensburg náði svo að jafna metin og var staðan 23-23 þegar tæplega korter var eftir. Ómar Ingi kom þá Magdeburg yfir af vítalínunni, og svo aftur í 25-24, og eftir það tókst Flensburg ekki að jafna aftur.

Þetta var fyrsta tap Flensburg á leiktíðinni en liðið er með níu stig í 2. sæti. Magdeburg er nú með átta stig og á leik til góða á Flensburg, og á topplið Melsungen sem er með tíu stig.

Arnór stýrði Holstebro til fjórða sigursins

Arnór Atlason stýrði sínum mönnum í TTH Holstebro til sigurs gegn Skjern á útivelli, 23-20, í dönsku úrvalsdeildinni.

Holstebro hefur því unnið fjóra af fyrstu sjö leikjum sínum á tímabilinu og er, alla vega tímabundið, í 3. sæti deildarinnar með níu stig.