Sig­ríður Hrönn Elías­dóttir er látin

Greint er frá andlátinu í Morgunblaðinu í morgun. Þar segir að Sigríður Hrönn hafi látist síðastliðinn laugardag eftir erfiða baráttu við MND-sjúkdóminn.

Sigríður Hrönn fæddist í Reykjavík en flutti með fjölskyldu sinni til Súðavíkur þegar hún var ung að árum. Að loknu námi starfaði hún meðal annars sem útibússtjóri Kaupfélagsins í Súðavík og lét að sér kveða í verkalýðsmálum. Hún varð svo oddviti hreppsnefndar 1986, var ráðin sveitarstjóri árið 1990 og gegndi starfinu þegar flóðin féllu að morgni 16. janúar 1995.

„Hún var að auki formaður al­manna­varna­nefnd­ar Súðavík­ur og mæddi mikið á henni á erfiðum tím­um, en 14 fór­ust í flóðinu. Sig­ríður lét af starfi sveit­ar­stjóra sum­arið 1995 en hélt áfram í hrepps­nefnd sem odd­viti þar til kjör­tíma­bil­inu lauk 1998.

Að lokn­um kosn­ing­um það ár varð hún formaður hafn­ar­stjórn­ar Súðavík­ur en hætti af­skipt­um af sveit­ar­stjórn­ar­mál­um 2002. Sam­hliða störf­um í hrepps­nefnd var hún m.a. svæðis­full­trúi Rauða kross­ins á Vest­fjörðum og sá þá um mót­töku flótta­fólks frá Júgó­slav­íu.

Einnig vann hún í Spari­sjóði Súðavík­ur og var starfsmaður Vinnu­mála­stofn­un­ar Vest­fjarða frá 2001 til 2006, er hún flutti til Reykja­vík­ur. Var hún fjár­mála­stjóri hjá Vélsmiðju Orms og Víg­lund­ar til 2022,“ segir í æviágipinu í Morgunblaðinu.

Fram kemur að ári eftir snjóflóðin hafi Sigríður Hrönn greinst með MS-sjúkdóminn og að mati lækna hafi mátt rekja veikindin til álagsins í kjölfar snjóflóðanna. Þá segir að árið 2019 hafi hún svo greinst með MND.

Sig­ríður var alla tíð virk í starfi Sjálf­stæðis­flokks­ins, hafði mik­inn áhuga á brids og varð meðal annars fyrst kvenna Íslands­meist­ari í ein­menn­ingi árið 2002.

Eft­ir­lif­andi börn Sig­ríðar Hrann­ar og Óskars Elías­son­ar, sem lést árið 2014, eru þau Alda Björk og Örvar Snær, og þá eru barna­börn­ fimm.