Munu ekki láta af her­ferð vegna launaþjófnaðarins

„Ef þú verslar mat við Ítalíu ertu að fjármagna launaþjófnað, vinnuréttarbrot og skattsvik“ er um það bil þýðingin á því sem stendur á hliðinni á bíl sem Efling hefur að undanförnu lagt fyrir utan veitingastaðinn Ítalíu. Þetta sættu nokkrir starfsmenn veitingarstaðarins sig ekki við og mættu til fundar við stjórnendur Eflingar og báðu um að látið yrði af þessu.

Undanfarið hefur verið fjallað um aðgerðir Eflingar vegna meints launaþjófnaðar fyrirtækja í eigu Elvars Ingimarssonar, sem meðal annars rekur Ítalíu. Starfsmennirnir, sem sögðu öll slík mál hafa verið leyst, söfnuðust saman fyrir utan húsnæði Eflingar við Guðrúnartún, áður en þeir gengu inn.

Starfsfólk í hættu á að missa vinnuna vegna bílsins

„Við höfum verið að vinna þarna um tíma og það eru engin vandamál. Það er allt eins og það á að vera. En Efling hættir ekki að leggja þessum bíl fyrir utan veitingahúsið svo við fáum enga viðskiptavini. Þess vegna er hætta á að við missum vinnuna,“ sagði Alex Gonzalez, starfsmaður Ítalíu, í viðtali við fréttastofu í dag.

Fólkið gekk svo inn í húsnæði Eflingar og óskaði eftir því að fá að ræða við einhvern sem eitthvað hefði með bílinn að gera.

„Þessi sendiferðabíll sem þau leggja fyrir utan veitingahúsið á hverjum degi er að tortíma okkur,“ sagði Alex við starfsfólk á skrifstofu Eflingar.

Fræðslustjóri Eflingar mætti á vettvang, og ræddi við starfsfólkið. Samtalinu lauk þannig að ákveðið var að ræða málin frekar, ásamt fyrrverandi starfsmönnum Ítalíu sem Efling hafi verið í samskiptum við.

Munu ekki láta af herferðinni

„Staðan er einfaldlega sú að það er stór hópur fólks sem Elvar Ingimarsson hefur ekki greitt laun. Stærsta útistandandi krafan sem við vitum um er 1,6 milljón króna, og svo er fjöldi annarra krafna,“ sagði Sólveig Anna Jónsdóttir, formaður Eflingar. Því verði ekki látið af herferðinni.

Það starfsfólk sem eigi inni laun styðji núverandi aðgerðir Eflingar.

„Staðan er líka sú að Elvar Ingimarsson skuldar Skattinum tæpar 32 milljónir króna, væntanlega meðal annars vegna þess að hann greiðir ekki staðgreiðslu af launum,“ sagði hún einnig.

Hlutverk Eflingar sé að standa vörð um réttindi verka- og láglaunafólks.

„Ef það fólk sem kom til Eflingar í dag hefur aftur samband við félagið, óskar eftir því að við liðsinnum þeim við eitthvað, óskar eftir því að við útskýrum fyrir þeim hver staðan er, þá að sjálfsögðu munum við gera það,“ sagði Sólveig.

Í samtali við fréttastofu hafnar Elvar alfarið ásökunum um launaþjófnað og skattaundanskot, og segir þær á borði lögfræðings síns. Hann viðurkennir þó að greiðslur í lífeyrissjóði og stéttarfélög hafi dregist, en segir verið að vinna bót á því.