Lík­lega verði flett ofan af fleirum í rann­sókn á brotum Diddy

„Þetta kemur ekki á óvart,“ segir Arnar Eggert. Ásakanir hafi verið að koma fram í ár og minni að mörgu leyti á mál Harvey Weinstein kvikmyndaframleiðandans sem var sakaður um kynferðisbrot gegn fjölda kvenna í metoo byltingunni.

Í ásökunum sé saga sem bendi til þess að ofbeldi hans hafi verið beitt kerfisbundnum hætti.

Arnar Eggert segir Combs hafa byrjað sinn feril í hip hop-i en sé svo einn þeirra sem hafi unnið að því að færa hip hop nær poppi og í RnB.

„Hann er bæði tónlistarmaður, og áhrifaríkur sem slíkur,“ segir hann og að um 1990 hafi hann búið til þennan ramma um „poppað hip hop“ eða RnB. Hann sá mógúll og brúðumeistari ferils margra annarra tónlistarmanna.

„Þegar þú ert kominn í þá stöðu. Dramb er falli næst. Menn verða drambsamir og álíta sig einhverja kónga.“

Hann segir Combs hafa lifað poppstjörnulífsstílinn upp í topp. Með stór partý og einkaþotur. Það hafi verið ofgnótt af öllu því hann hafi getað það. En þegar fólk lifi þannig þá brenglist gildin og fólk týni sér í „búbblunni“.

„Hlutir sem okkar þykja ekki í lagi verða „legio“ í þessum veruleika,“ segir Arnar Eggert.

Metoo stoppi ekki svona menn

Meint brot Combs ná yfir nokkuð mörg ár en sum þeirra eru nokkuð ný. Um sjö ár eru frá því að metoo byltingin átti sér stað. Arnar Eggert segir það ekki skipta máli fyrir menn í þessari stöðu sem brjóti svona af sér.

„Menn sem stunda þetta doka ekki við og segja úps, best að ég hætti þessu,“ segir Arnar Eggert. Það hvarfli ekki að þeim að hætta en það sem hafi breyst er að þrýstingurinn er meiri. Það sem hafi mátt fyrir 30 árum megi ekki lengur. Það hafi valdið því að þegar brotið er á einhverjum er fólk fljótara að segja nei en einnig eru gerendur passasamari.

Hann segir magnað að horfa til baka og telur að sem dæmi allir meðlimir Led Zeppelin væru líklega bak við lás og slá hefði verið miðað við sömu viðmið í dag. Oft sé vísað til einhverrar grúppíumenningar en það séu bara ekki skýringar sem sé lengur hægt að styðjast við. Það sé eftiráskýring.

„Það er hægt að vera í góðu rokki og róli án þess að vera ömurlegur.“

Í tengslum við ásakanir gegn Combs hafa margir velt vöngum yfir því hvort hann hafi átt í óeðlilegu sambandi við Justin Bieber og hverjir hafi verið í veislunum sem Combs hélt þar sem hann hafi verið sakaður um ýmsa varasama hluti. Í því samhengi hafa verið nefnd nöfn eins og ay-Z, Kim Kardashian, Kanye West, Naomi Campbell, Mary J. Blige, Dr. Dre, Ashton Kutcher og Leonardo Dicaprio.

Býst við meiru

Arnar Eggert segir að þegar svona mál koma upp þá komi það í ljós hversu lítill í raun og veru Hollywood-heimurinn er.

„Ég held að við séum að horfa á dag eitt í einhverri svakalegri atburðarás og það verði flett ofan af fólki á næstu vikum og mánuðum. Ég sé það alveg fyrir mér,“ segir hann. Það hafi gerst þegar flett var ofan af Winstein og Jimmy Savile í Bretlandi.

Í þeim tilfellum hafi frægð verið tekin fram fyrir fórnarlömbin. Hann segir í raun ótrúlegt hversu mikið hefur verið horft fram hjá því. Fólk verði samdauna einhverri stemningu en þegar einhver setji hnefann í borðið sjái það hlutina í öðru samhengi.

Fram hefur komið í fréttum um málið að hann hafi fengið ýmist starfsfólk til að aðstoða sig við skipulagningu glæpa sinna. Það sé óljóst hvort þau eigi að bera ábyrgð. Þau hafi verið meðvirk og það sé erfitt að sjá hver rótin er.

„Þetta er djöfullegt þegar þú horfir á athæfin sem slík.“