Vopnuð börn og játning í dular­fullu máli

Lögreglan telur að stórfellt átak þurfi til að taka á hnífaburði barna. Dæmi er um að börn gangi um með rafbyssur og piparúða. Einnig hefur borið á því að börn mæti með hnífa í skólann.

Við fjöllum um málið í kvöldfréttum Stöðvar 2 og verðum einnig í beinni frá miðborginni þar sem við ræðum við rekstrarstjóra skemmtistaðar um ofbeldi á næturlífinu.

Börn niður í þrettán ára þurftu að nýta sér þjónustu miðbæjarathvarfsins svokallaða vegna ölvunar á menningarnótt. Í kvöldfréttum verður rætt við sérfræðing sem segir dæmi um að börn hafi verið ósjálfbjarga af drykkju, sum snemma dags.

Í dag fór fram fjölmenn netárásaræfing á vegum Syndis og Origo. Við fylgjumst með henni en þar tóku meðal annars leikarar þátt til að láta atburðina líta eins raunverulega og hægt er.

Þá fjallar Heimir Már Pétursson um mjög áhugavert mál sem á rætur að rekja til ársins 1953. Þá upplýsti Morgunblaðið að útsendarar alþjóðlegra kommúnista hefðu framið glæp í skjóli nætur og svívirt íslenska Þjóðsönginn. Afbrotamennirnir fundust aldrei en nú rúmum sjötíu árum síðar gengur einn þeirra fram fyrir skjöldu og játar þátt sinn í málinu.

Auk þess verðum við í beinni útsendingu frá setningu hátíðarinnar Reykjavík Bear Festival og förum yfir spennandi stöðu hjá Víkingi í Sportpakkanum en liðið er aðeins einum leik frá því að komast í Sambandsdeild Evrópu.

Í Íslandi í dag kíkir Vala Matt á einstakan veitingastað sem var verið að opna í gróðurhúsi en þar er grænmeti ræktað undir glergólfi staðarins.

Þetta og margt fleira í opinni dagskrá á samtengdum rásum Bylgjunnar, Stöðvar 2 og Vísis klukkan 18:30.