Ný stjórn hefur verið kjörin í bankaráð Landsbankans. Jón Þ. Sigurgeirsson, ráðgjafi hjá menningar- og viðskiptaráðuneytinu er nýr formaður ráðsins og tekur við af Helgu Björk Eiríksdóttur sem hefur sinnt formannsstörfum síðustu átta ár.
Bankasýsla ríkisins lagði til að Jón yrði nýr formaður ráðsins og var tillagan samþykkt á aðalfundi bankans sem fram fór nú síðdegis.
Vika er síðan Bankasýsla ríkisins ákvað á fundi sínum að skipta öllu bankaráði út vegna vinnubragða í tengslum við kaup bankans á öllu hlutafé í TM tryggingum.
Jón Þ. Sigurgeirsson, sem hefur undanfarin tvö ár verið efnahagsráðgjafi viðskiptaráðherra, er tilnefndur af Bankasýslu ríkisins sem annar af tveimur nýjum bankaráðsmönnum Landsbankans. Lagt er til að Jón, sem starfaði um langt árabil hjá Seðlabankanum, verði formaður bankaráðs.
