Til­boð Icelandair það eina og langt yfir á­ætlun

Samkvæmt opnunarskýrslu útboðsins var áætlaður verktakakostnaður Vegagerðarinnar 1,3 milljarðar en tilboð Icelandair hljóðar upp á 3,5 milljarða og er því tæpum 2,2 milljörðum yfir áætlun.

„[Það barst] sem sé þetta eina tilboð og við erum bara að fara yfir það og skoða málið í framhaldinu og getum ekkert sagt í bili,“ segir G. Pétur um tilboðið.

Tilkynntu í fyrra að þau myndu hætta flugi

Í mars 2025 greindi Bogi Nils Bogason, forstjóri Icelandair, frá því að Icelandair hygðist hætta að fljúga til Ísafjarðarbæjar eftir sumarið 2026. Ástæðan væri sérstaða flugvallarins sem leiddi til þess að einungis litlar vélar geta lent þar.

Eyjólfur Ármannsson, samgönguráðherra sagði við það tilefni það mjög slæmar fréttir að Icelandair ætlaði að hætta flugi og sagði stjórnvöld ætla að tryggja að fluginu yrði ekki hætt.  

„Við ætlum að tryggja að það verði flogið til Ísafjarðar eftir lok sumars á næsta ári. Þetta er bara vinna sem ég mun fara í,“ sagði Eyjólfur en bæjarstjóri Ísafjarðarbæjar gagnrýndi ákvörðunina einnig á sama tíma. 

Útboðið var auglýst á vef Vegagerðarinnar þann 23. janúar síðastliðinn og lauk útboðinu svo á þriðjudaginn. Útboðið var auglýst á Evrópska efnahagssvæðinu.

Í útboðsauglýsingu kom fram að boðið væri út flugleiðin Reykjavík – Ísafjörður– Reykjavík og að samningstími væri fjögur ár, frá 1. september 2026 til og með 31. ágúst 2030, með möguleika á framlengingu einu sinni í eitt ár.

Þá kemur fram að ekki verði haldinn sérstakur opnunarfundur en að eftir lok tilboðsfrests verði bjóðendum tilkynnt um nöfn bjóðenda og verðtilboð. Á vef útboðsins segir í opnunarskýrslu þess að það feli ekki í sér niðurstöðu. Þar sé einungis birt heildartilboðsfjárhæð en endanlegt val getur ráðist af fleiri valforsendum samkvæmt útboðsgögnum. Þá er einnig tekið fram að framsetning opnunarskýrslu sé með fyrirvara um hugsanlega reiknivillu og að ekki sé búið að meta gildi tilboða.