Jón segir upp­lýsinga­ó­reiðu að finna í frum­varpi Andrésar Inga

Fjöldi þingmanna steig í pontu í umræðu um málið. Þeirra á meðal Jón sem sagði frumvarpið óvandað og að þeir sem hafi skrifað það hafi ekki vandað til verka. Þannig má segja að umræðan hafi á köflum verið persónuleg.

Gamall lobbíisti brýst fram

„Ekki að það komi á óvart þegar sést hver framsögumaður er í þessu en það er auðvitað sárt að sjá margt ágætisfólk skrifa undir þetta án þess að hafa kíkt á innihaldið því slík er upplýsingaóreiðan í þessu.“

Jón beindi þarna orðum sínum að Andrési Inga fyrsta flutningsmanni frumvarpsins. Flutningsmenn koma úr röðum Pírata, Samfylkingar, Viðreisnar og Flokki fólksins.

Og hann útskýrði nánar hvar hann fann upplýsingaóreiðu í frumvarpinu.

„Til að mynda kemur hér fram að samkvæmt þeirri skýrslu sem MAST gaf út standi að veiðiaðferðir Hvals. hf standist engan veginn kröfur laga um dýravelferð. Þetta er einfaldlega röng fullyrðing. Niðurstaðan var einmitt sú að veiðarnar brytu ekki gegn lögum um velferð dýra,“ sagði Jón.

Andrés Ingi steig í pontu og svaraði í sömu mynt þegar hann rifjaði upp bakgrunn Jóns.

„Ég vil þakka háttvirtum þingmanni ræðuna. Það er gaman að sjá gamla lobbíistann taka sig upp í honum. Mér leið á köflum eins og ég væri ekki að hlusta á Jón Gunnarsson þingmann heldur Jón Gunnarsson stofnanda og formann sjávarnytjafélagsins sem hann setti á laggirnar til að berjast fyrir hvalveiðum en svona getur fólk haft marga hatta,“ sagði Andrés.

Gömul leiðindi tóku sig upp við að hlusta á Jón

Andrés vildi ekki gangast við því að hafa sagt ósatt í greinargerðinni.

„Þess er sérstaklega gætt að segja hvergi að lögin hafi verið brotin. Það er náttúrulega staðhæfing sem væri erfiðara að styðja en þær staðhæfingar sem eru þarna að veiðarnar væru andstæðar lögunum, að veiðarnar samrýmist ekki ákvæðum laga um dýravelferð og að veiðarnar stríði gegn lögum um dýravelferð. Þetta hefði þingmaðurinn kannski fattað ef hann hefði lesið alla frétt MAST um skýrsluna sem kom út í maí þar sem fyrirsögnin er í stóru letri: veiðar á stórhvelum samræmast ekki markmiðum laga um dýravelferð. Þannig að ef einhver er að drukkna í upplýsingaóreiðupolli þá held ég að það sé frekar háttvirtur formaður áhugafélags um hvalveiðar,“ sagði Andrés.

Þórunn Sveinbjarnardóttir, þingmaður Samfylkingarinnar, lagði meðal annarra orð í belg og það mátti heyra af tali Þórunnar að hún væri ekki yfir sig hrifin af málflutningi Jóns.

„Það tóku sig hér upp gömul leiðindi við að hlíða á viðbrögð háttvirts þingmanns Jóns Gunnarssonar við þessu ágæta frumvarpi. Vegna þess að ég hafði nú haldið að reynslumikið fólk í stjórnmálum væri komið á þann stað að það gæti kannski talað með uppbyggilegum hætti um það efni sem er á dagskrá þó svo að viðkomandi sé ósammála því, það er auðvitað bara allt önnur saga.“