Engin heil­brigðis­þjónusta í fjögur þúsund manna bæjar­fé­lagi

Suðurnesjabær er sveitarfélag á Reykjanesskaga, Sandgerðisbær og Sveitarfélagið Garður, sem sameinuðust í Suðurnesjabæ í júní 2018. Bæjaryfirvöld þar vinna nú að því að tryggja heilbrigðisþjónustu í sveitarfélaginu en það þekkir Anton Guðmundsson, formaður bæjarráðs Suðurnesjabæjar manna best.

„Það er svolítil staðreynd að það er hvorki heilbrigðisþjónusta í sveitarfélaginu né hjúkrunarheimili. Við erum þó með dagvistun aldraðra, sem náðist í gegn fyrir stuttu síðan en við teljum bara að sveitarfélag af þessari gráðu, sem telur nú bráðum fjögur þúsund íbúa eigi rétt á því og það er bara lögum samkvæmt að fá heilbrigðisþjónustu í heimabyggð,“ segir Anton Guðmundsson, formaður bæjarráðs Suðurnesjabæjar. 

„Þá hefur verið mikið talað fyrir því að bjóða upp á mögulega heilsugæslusel, sem yrði hluti af útibúi frá heilbrigðisstofnun og sveitarfélagið er tilbúið að leggja til húsnæði undir slíka starfsemi.“

Hann tekur það fram að forsvarsmenn Suðurnesjabæjar séu í góðum samskiptum við heilbrigðisráðherra og þingmenn kjördæmisins um að koma málinu í gegn sem fyrst og að hann sé mjög vongóður um að það takist.