Segja HSÍ halda Val í gíslingu: „Þetta eru galin vinnubrögð“

Fyrr í vikunni fór Dagur í viðtal við Vísi sem hefur vakið mikla athygli. Þar bar hann forráðamönnum HSÍ ekki vel söguna, gagnrýndi þá fyrir fyrir slæleg vinnubrögð og samskiptaleysi og lýsti því yfir að hann hefði ekki lengur áhuga á að starfa fyrir þá.

„Þetta var vísir að einhverju leikriti og ég skynjaði það mjög snemma, þegar ég var spurður hvort að við ættum ekki bara að hittast á kaffihúsi. Þá vissi maður nú að það væri ekki mikið á bakvið þetta og það kom í ljós á fundinum að þetta var bara eitthvað tjatt um daginn og veginn, og mér fannst þeir frekar uppteknir af því hvort að formaðurinn og framkvæmdastjórinn yrðu ekki örugglega áfram í fararstjórninni hjá landsliðinu. Ég var smá sjokkeraður og fannst þetta frekar skrýtið allt saman,“ sagði Dagur meðal annars.

Dagur fór á fundinn, sem á endanum fór reyndar ekki fram á kaffihúsi, fyrir fimm vikum en hefur síðan ekkert heyrt í forráðamönnum HSÍ. Þeir ræddu einnig við Svíann Michael Apelgren og Snorra Stein Guðjónsson. Tíminn til að ráða þann fyrrnefnda er runninn út ákvæði í samningi hans við sænska félagið Sävehof, sem gerði honum kleift að taka við landsliði, rann út um síðustu mánaðamót.

Svo virðist sem það sé vilji hjá HSÍ að ráða erlendan landsliðsþjálfara og meðal þeirra sem hafa verið nefndir í því samhengi eru Christian Berge, þjálfari Kolstad og fyrrverandi landsliðsþjálfari Noregs. Arnar Daði velti þeirri spurningu upp í Handkastinu hvort ummæli jafn stórs aðila í handboltaheiminum og Dags hefðu fælingarmátt í för með sér. „Ætli þessi orð Dags Sigurðssonar hafi áhrif á stöðu HSÍ til að finna topp þjálfara?“ sagði Arnar Daði.

„Dagur varð Evrópumeistari með Þjóðverjum. Það var ekkert smá dæmi. Auðvitað munu erlendir þjálfarar hugsa sig um og heyra í Degi. En ég held að á endanum muni erlendur þjálfari aldrei þjálfa þetta lið,“ sagði Davíð Már Kristinsson sem var gestur Arnars Daða ásamt Hrannari Guðmundssyni. Sá síðastnefndi botnar lítið í vinnubrögðum HSÍ síðustu vikurnar.

Bara möguleikar í neðsta flokki

„Í byrjun, fyrir 5-6 vikum, var talað við Apelgren, Dag og Snorra. Hvaða nöfn hafa komið upp síðan, Christian Berge. Hvað var verið að gera í þessar fjórar vikur? Af hverju var ekki hringt í Snorra og Dag og sagt, við ætlum ekki að nota ykkur,“ sagði Hrannar.

„Þeir eru búnir að segja óbeint að Dagur og Snorri séu ekki möguleikar nema þeir séu í lægsta flokki, ef allt klikkar. Þeir voru boðaðir á fund fyrir fimm viku.“

Snorri er samningsbundinn Val og Hrannar sagði að HSÍ hefði sett hann og félagið hans í erfiða stöðu.

„Að halda Val í gíslingu. Hvenær verður hann ráðinn? Í júlí,“ sagði Hrannar. „Snorri verður að fá svör sem fyrst,“ bætti Davíð við.

„Þetta eru galin vinnubrögð og það má ekki gleyma því að HSÍ eru félögin og þarna er HSÍ enn og aftur að skíta í heyið.“

Hlusta má á Handkastið í spilaranum hér fyrir ofan. Umræðan um landsliðið hefst á 50:00.