Kostulegar lýsingar Jakobs á verkahring nýs verkefnastjóra

Jakob féllst ekki á þann skilning margra, að þetta starf geti ekki verið raunverulegt - og að flókið sé að réttlæta það. Þvert á móti er að hans sögn morgunljóst af starfslýsingunni að dæma, að um mikilvægt starf sé að ræða. Þannig blæs hann á þá gagnrýni sem fram hefur komið, að ráðið sé í svona stöðu í miðju ráðningabanni.

„Þetta er í rauninni mjög skýrt starf,“ segir Jakob. „Í starfslýsingu segir meðal annars: Á verkefnastofu er unnið eftir hugmyndafræði verkefnastjórnunar. Verkefnum er fylgt eftir frá upphafi til enda, þvert á verkþætti og ábyrgðarsvið fagskrifstofa.“

Jakob bendir á að þegar Einar Þorsteinsson formaður borgarráðs hafi boðað ráðningabann hafi hann tekið fram að það gilti ekki á leikskólum, í frístund eða í nauðsynlegri velferðarþjónustu sem borgin þurfi að sinna. Af þessu megi ráða að verkefnastjóri framtíðarinnar sé í raun hluti af nauðsynlegri velferðarþjónustu.

„Finnst þér það ekki vera velferðarmál, að verkefni séu unnin frá upphafi til enda? Ég bara spyr þig,“ segir Jakob.

Sjá má fyrir sér að það geti reynst örðugt að gera grein fyrir atvinnu sinni gagnvart til dæmis tengdaforeldrum, ef starfstitill manns er verkefnastjóri framtíðarinnar. Það er ekki ólíkt því sem margir upprennandi uppistandarar kunna að lenda í; sé einstökum árangri ekki þegar til að dreifa má ætla að dæmigerðar óskastarfsgreinar tengdasona sé jafnan að finna á öðrum sviðum.

„Ef fólk veit ekki hver maður er þegar maður er grínisti og maður segist vera grínisti, þá hugsar fólk ósjálfrátt: Þessi maður er lúser. Ef einhver er grínisti, þá bara veistu það,“ segir Jakob. Þetta sama gildir að sögn Jakobs líklega ekki um verkefnastjóra framtíðarinnar.