„Óvinurinn færir okkur ekki gjafir eða gerir okkur greiða“

Í gær lýstu þeir Sergei Surovkin, herforingi sem er yfir innrás Rússa í Úkraínu, og Sergei Shoigu, varnarmálaráðherra, því yfir í beinni útsendingu að Rússar myndu yfirgefa Kherson-borg og vesturbakka Dniproár.

Var það eftir að Úkraínumenn voru sagðir hafa unnið stóran sigur norður af Kherson-borg og sækja fram gegn Rússum úr nokkrum áttum í héraðinu.

Rússar hafa um nokkuð skeið gefið í skyn að til standi að hörfa frá vesturbakkanum en Úkraínumenn hafa ávallt tekið slíkum yfirlýsingum með miklum fyrirvara. Ráðamenn í Kænugarði hafa haft áhyggjur af því Rússar vilji laða úkraínska hermenn í gildru í borginni, því samhliða tali um mögulegt undanhald hafi Rússar haldið áfram að byggja upp varnir við borgina og flutt liðsauka og hergögn á svæðið.

Rússar hafa einnig verið að byggja upp varnir á austurbakka Dnipro.

RIA fréttaveitan, sem er í eigu rússneska ríkisins, segir undanhaldið frá vesturbakkanum byrjað. Hermenn séu þegar byrjaðir að koma sér fyrir í varnarstöðum á austurbakkanum, samkvæmt Varnarmálaráðuneyti Rússlands.

Segir bardaga halda áfram

Vólódímír Selenskí, forseti Úkraínu, sagði í ávarpi sínu í gærkvöldi að efasemdir væru eðlilegar.

„Óvinurinn færir okkur ekki gjafir eða gerir okkur greiða.“

Selenskí sagði bardaga halda áfram og að úkraínskir hermenn væru enn að falla í átökum við Rússa í Kherson-héraði. Rússar veittu alltaf mótspyrnu.

Þess vegna þyrftu Úkraínumenn að passa sig að taka ekki óþarfa áhættu og tryggja að mannfall yrði ekki mikið.

„Þannig munum við frelsa Kherson, Kakhovka, Donetsk og aðrar borgir okkar.“

Úkraínskir hermenn eru byrjaðir að birta myndefni frá nýlega frelsuðum bæjum í Kherson. Uppfært 13:00 Staðfest er að úkraínskir hermenn eru í bænum Kiselyvka, sem er í einungis fimmtán kílómetra frá Kherson-borg.

Í ávarpinu beindi Selenskí orðum sínum til Rússa og sagði að ef þeir myndu sprengja upp stífluna í Kakhovka, sem er stífla við vatnaflsvirkjun ofar í Dnipro, væru þeir að lýsa yfir stríði við allan heiminn. Bresti stíflan er útlit fyrir að kjarnorkuverið í Zaporizhia yrði án kælingar, sem gæti leitt til kjarnorkuslyss og meðfylgjandi geislunar.

Segir Rússa ætla að leggja Kherson í rúst

Rússar hafa flutt óbreytta borgara frá Kherson-borg og nærliggjandi svæðum í massavís en Úkraínumenn segja þessu fólki hafa verið rænt og þvingað á brott.

Mykhailo Podolyak, ráðgjafi Selenskís, sagði í tísti í morgun að Rússar ætluðu sér að gera borgina að rústum einum. Þeir væru búnir að koma fyrir jarðsprengjum og gildrum um alla borg og hefðu komið fyrir stórskotaliði á austurbakka Dnipro sem nota ætti til að jafna borgina við jörðu eftir undanhaldið.

Minna en tveir mánuðir eru liðnir frá því Vladimír Pútín, forseti Rússlands, skrifaði undir ólöglega innlimun á fjórum héruðum Úkraínu og þar á meðal Kherson. Forsetinn lýsti því þá yfir að Kherson tilheyrði nú Rússlandi og myndi gera það að eilífu. Fjölmargir rússneskir embættismenn hafa sótt borgina heim og slegið á svipaða strengi og Pútín en borgin er eina héraðshöfuðborgin sem Rússar hafa hernumið frá því innrás þeirra hófst í febrúar.

Sjá einnig: Bölsótaðist út í Vesturlönd

Frelsun Kherson-borgar gæti táknað mikil kaflaskipti í stríðinu og mikinn hernaðarlegarn og táknrænan sigur fyrir Úkraínumenn. AP fréttaveitan segir að það gæti gert úkraínska hernum kleift að herja á Rússa í Saporisjía-hérað og önnur svæði í Suður-Úkraínu. Þar á meðal er Krímskagi, sem Rússar innlimuðu ólöglega árið 2014.