Mun skoða hvort æski­legt sé að virkja í frið­landi

Starfshópur um raforkumál á Vestfjörðum skilaði skýrslu til ráðherra með tillögum sínum um það hvernig hægt væri að auka framboð raforku í landshlutanum sem fyrst.

Samkvæmt tillögum hópsins verður að virkja meira fyrir vestan.

Guðlaugur Þór Þórðarson orkumálaráðherra segist ætla að byggja á töllögum hópsins.

„Að sjálfsögðu - til þess er leikurinn gerður,“ segir hann. 

Hann er þannig sammála hópnum um þörfina fyrir virkjun.

„Það liggur alveg fyrir að það þurfi að virkja eitthvað fyrir vestan. Hins vegar eru nokkrir valkostir eins og eru dregnir fram í skýrslunni og það eru líka fleiri hugmyndir en koma fram þar,“ segir Guðlaugur. 

Á meðal þess sem starfshópurinn leggur til er að ráðherrann ráðist í það verkefni að skoða hvort hann geti breytt friðlýsingarskilmálum í Vatnsfirði svo hægt yrði að virkja þar.

En hvernig lýst honum á það?

„Við skoðum auðvitað alla möguleika. Það liggur alveg fyrir.“

Samkvæmt heimildum fréttastofu væri virkjun í friðlandinu eitur í beinum margra þingmanna Vinstri grænna.

Umhverfisvernd eða orkuskipti?

En samspilið milli hinna umhverfisvænu orkuskipta og náttúruverndar er afar flókið.

Í Súðavík mun stærsta kalkþörungaverksmiðja landsins taka til starfa eftir tvö ár og vegna orkuskorts þar mun hún keyra starfsemi sína á gasi þar til bætt verður úr orkumálunum.

Þetta segir Guðlaugur bagalegt.

„Ef að þú segir við mig að við séum að fara að stofna eitthvað sem að keyrir á jarðefnaeldsneyti.. Ég veit ekki hvaða orðalag ég á að nota. Það fer fyrir hjartað á mér. Mér líður mjög illa með það,“ segir Guðlaugur. 

Uppbyggingin á Vestfjörðum er mikil og ef ráðast á í orkuskipti liggur fyrir að tryggja verði auka 80 megavött í landshlutanum fyrir árið 2030.

Guðlaugur segir ljóst að það verði að gera ansi mikið til að ná því markmiði.

„Það skiptir ekki máli hvort það séu Vestfirðir eða einhver annar staður á landinu. Ef við segjum við hann: „heyrðu þú mátt ekki taka þátt í orkuskiptunum og fá græna orku“ þá erum við bara að segja við viðkomandi landshluta að þeir verði ekki með í lífskjaraþróun nútíðar og framtíðar,“ segir Guðlaugur Þór.