Væri heiður að fá að starfa aftur hjá Eflingu

Eins og greint var frá í gær var dregin upp afar nei­kvæð mynd af stjórnar­háttum Viðars og Sól­veigar í út­tekt sem gerð var af ó­háðum greiningar­aðila fyrir skrif­stofu Eflingar.

Út­tektin er byggð á við­tölum við 48 starfs­menn skrif­stofunnar og segja grein­endurnir það mikið á­hyggju­efni hve tíð­rætt þeim varð um kyn­bundna á­reitni, of­beldi og ein­elti af hálfu Viðars.

Sól­veig Anna er nú aftur í fram­boði til formanns fé­lagsins en for­manns­kosningin hefst í næstu viku, þann 9. febrúar, og stendur í viku.

Næstu stjórnar að ráða framkvæmdastjóra

Viðar og Sól­veig hafa unnið náið saman síðustu ár en Viðar segist ekki koma ná­lægt fram­boði Sól­veigar nú með beinum hætti. „Ég er bara einn af fjöl­mörgum sem styður já­kvæðar breytingar í verka­lýðs­hreyfingunni. En ég er ekki aðili að fram­boðinu,“ segir hann.

En ertu að að­stoða hana eitt­hvað með fram­boðið?

„Ég hef unnið svona smá sjálf­boða­störf… hengt upp eitt eða tvö plaköt.“

Langar þig að koma aftur inn í fé­lagið sem fram­kvæmda­stjóri ef Sól­veig vinnur for­manns­kjörið?

„Það er auð­vitað bara eitt­hvað sem að stjórn og ný for­ysta á­kveður í fé­laginu þegar þar að kemur. Ég held að það sé náttúru­lega ljóst að ef að Bar­áttu­listinn [listi Sólveigar Önnu] sigrar í þessum kosningum þá verður eitt­hvert verk fyrir höndum að byggja upp starf­semina á ný. Og það er þá bara þeirra að finna út úr því.“

Hann úti­lokar því alls ekki að hann gæti snúið aftur til starfa innan Eflingar.

„Nei, ég meina.. Það væri mér náttúru­lega bara heiður að geta fengið að taka þátt í því verk­efni að halda á­fram að byggja hér upp raun­veru­lega öfluga verka­lýðs­hreyfingu sem vinnur fyrir fé­lags­fólk. Svo sannar­lega.“

Fjallað var um nýja úttekt á starfsháttum Viðars og Sólveigar í Kvöldfréttum Stöðvar 2 í gær. Þar var rætt við bæði Viðar og núverandi framkvæmdastjóra Eflingar sem svarar ásökunum hans. Hægt að horfa á fréttina í spilaranum hér að neðan og nálgast ítarlegri umfjöllun í fréttunum fyrir neðan hana: