Ætla að kenna Kananum að taka kaldhreinsað lýsi

Í fréttum Stöðvar 2 var fyrirtækið Dropi heimsótt en það er á hafnarbakkanum í Bolungarvík. Það varð til árið 2012 þegar þær Anna Sigríður Jörundsdóttir, Birgitta Baldursdóttir og Sigrún Sigurðardóttir ákváðu að bregða sér í slorgallan eftir hagnýtt meistaranám við Háskóla Íslands.

Námsverkefni þeirra var að vinna með þorskalýsið. Upphaflega hugmyndin var að framleiða lýsi fyrir gæludýr í Bandaríkjunum. Það breyttist og þær ákváðu frekar að einbeita sér að mannfólkinu.

„Svo fórum við að lesa okkur til og sáum það hvernig lýsi er búið til í dag. Það er komið svo langt frá sínum uppruna. Við ákváðum að reyna að útbúa lýsi eins og það var gert nánast í gamla daga,“ segir Sigrún.

Að þeirra sögn felst munurinn í því að lýsið er kaldunnið en ekki soðið. Hráefnið gerist vart ferskara því það fæst samdægurs frá smábátum sem landa í Bolungarvík.

„Við tökum bara af dagróðrabátum og erum þannig með ferska lifur. Við þurfum ekki að bragðhreinsa eða lyktarhreinsa,“ segir Anna Sigríður.

Fyrir vikið segja þær vítamínin varðveitast betur.

„Þú þarft bara eina teskeið af okkar lýsi. Því að öll upprunalegu vítamínin eru í. Og A-vítamín er hátt og þá takmarkast það við eina teskeið,“ segir Sigrún.

Þær hafa til þessa mest selt til Bandaríkjanna í gegnum netverslanir en hafa núna fengið styrk úr Matvælasjóði, þann hæsta í ár, til að koma lýsinu í smásöluverslanir vestanhafs. „Hrein fiskiolía í vesturvíking“ heitir verkefnið og er skráð á True Westfjords ehf., framleiðslufyrirtæki Dropa.

„Okkur var úthlutað 25,5 milljónum í markaðsstarf. Mjög þakklátar og bara skiptir sköpum fyrir okkur,“ segir Anna.

Og til að auðvelda Kananum að taka lýsi bjóða þær einnig lýsispillur og lýsi með bragðefnum, eins og fennel, engifer og myntu. En eiga þær eftir að verða ríkar á þessu?

„Vonandi einhvern tímann,“ svarar Sigrún og Anna kinkar kolli brosandi.

Hér má sjá frétt Stöðvar 2: