Telur galið að stóru fjölmiðlarnir fái ríkisstyrki

Þetta er á meðal þess sem kom fram í viðtali við Þórhall í Bítinu á Bylgjunni í morgun.

23 einkareknum fjölmiðlum var alls úthlutað 400 milljónum í fyrra til þess að mæta efnahagsáhrifum heimsfaraldurs kórónaveiru. Alþingi samþykkti fyrr á árinu að áfram yrðu einkareknum fjölmiðlum veittir sambærilegir styrkir út næsta ár og sóttu 22 fyrirtæki um styrk.

Árvakur og Sýn þáðu hæstu styrkina

Árvakur, sem á og rekur Morgunblaðið, mbl.is og K100, og Sýn, sem á og rekur Stöð 2, Bylgjuna, Vísi og fleiri fjölmiðla, þáðu hæstu styrkina í fyrra. Árvakur fékk 99,9 milljónir en Sýn 91,1 milljón. Þannig þáðu þessi tvö fyrirtæki tæplega helming þeirrar upphæðar sem stóð til boða.

Þórhallur, sem er framkvæmdastjóri þeirrar deildar sem inniheldur fjölmiðlana í eigu Sýnar, er á því að stór fjölmiðlafyrirtæki ættu að geta staðið á eigin fótum.

„Það er náttúrulega bara galið að við séum að þiggja peninga af ríkinu og séum styrkt af ríkinu. Við erum gríðarlega öflugur fjölmiðill, með fjölda áskrifenda. Við erum með ótal tækifæri,“ sagði Þórhallur í Bítinu í morgun.

Ekkert væri þó að því að styrkja minni eða sérhæfðari fjölmiðla.

„Mér finnst alveg sjálfsagt að styrkja fjölmiðla sem standa höllum fæti og eru minni miðlar eða landsbyggðarmiðlar eða þeir sem leggja stund á rannsóknarblaðamennsku eingöngu. En að svona stórir miðlar eins og Árvakur eða við séum að njóta einhvers sérstaks ríkisstuðnings, mér finnst það bara galið,“ sagði Þórhallur.

Hlusta má á viðtal við Þórhall í Bítinu hér fyrir neðan. Umræðan um ríkisstyrki hefst þegar sex mínútur eru liðnar af klippunni.

Rímar þetta illa við það sem fram kom í máli Sigríðar Daggar Auðunsdóttur, formanni Blaðamannafélags Íslands, á Rás 1 í vikunni þar sem hún sem sagði að ekki væri spurning um hvort ætti að styrkja fjölmiðla á Íslandi, heldur um hversu mikið. Staðan væri það slæm að valið stæði á milli ríkisstyrktra fjölmiðla eða engra fjölmiðla.

„Ég trúi því að í ljósi umræðunnar undanfarna vikur og mánuði, að stjórnmálaflokkar geri sér grein fyrir því að þetta er í rauninni bara spurning um það hvort þú viljir fjölmiðla sem eru ríkisstyrktir eða enga fjölmiðla. Við erum komin þangað,“ segir Sigríður Dögg í samtali við Þröst Helgason í Svona er þetta á Rás 1.

Setja þurfi leikreglur sem gildi til jafns um alla á auglýsingamarkaði

Skilja mátti á Þórhalli í Bítinu að hann teldi að með ríkisstyrkjum til fjölmiðla væri ríkisvaldið að reyna að leysa rekstrarvanda allra fjölmiðla, því að það gæti ekki leyst eitt vandamál.

Þú segir eitt vandamál og það er að taka RÚV af auglýsingamarkaði?

„Já, ef að ríkið kýs að vera með RÚV á auglýsingamarkaði og telja það að það haldi Ríkisútvarpinu á lífi, þá bara gera þau það. En ég ætla ekki að eyða orku minni í að velta því fyrir mér hvernig RÚV á að lifa.

Auðvitað vitum við að RÚV yrði miklu, miklu betri miðill án auglýsinga. Það er bara staðreynd. Þau eiga bara að einbeita sér að því að nota þann pening sem þau fá, af afnotagjöldum, það eru heilir fimm milljarðar sem þú getur unnið með. Það er kostnaður að reka auglýsingadeildir, það er bara gríðarlegur kostnaður,“ sagði Þórhallur.

Í máli hans kom einnig fram að ríkið gæti einnig sótt sér fé til að að aðstoða fjölmiðla í erfiðum rekstri hér á landi með því að skattleggja erlenda miðla sem eru inni á íslenskum auglýsingamarkaði, án þess að greiða skatta hér á landi, til að mynda Facebook. 

„Þessir aðilar eru að selja auglýsingar inn hérna inn á íslenskum markaði án þess að tekin sé af því íslenskur skattur eða eitthvað slíkt. Þannig að þau eru bara frjáls inn á þessum markaði og eru með miklu betri kjör einfaldlega vegna þess að þau leika lausum á hala á íslenskum markaði, alveg þvert gegn öðrum miðlum. Það eru engar reglur um efnisveiturnar sem eru sambærilegar þeim sem við þurfum að gangast undir.

Þannig að ef stjórnvöld ætla að afla sér tekna, til dæmis til þess að styðja litlu miðlana, þá geta þau fjármagnað þau bara með því að setja reglur, skýrar reglur á samfélagsmiðla og erlenda fjölmiðla inn á þessum markaði,“ sagði Þórhallur.

Vísir er í eigu Sýnar.