Blessaður leigu­­samningurinn veiti heimild fyrir merkingunum

Vísir greindi frá því í morgun að Guð­rún Karls Helgu­dóttir, sóknar­prestur í Grafar­vogs­kirkju, væri alls ekki sátt við að kirkjan væri nú merkt Flokki fólksins í bak og fyrir. Merkingar flokksins eru á gluggum kirkjunnar og þá er flokkurinn einnig merktur á skilti fyrir utan kirkjuna og á aug­lýsinga­fána sem blaktir þar. Guð­rún sagði að flokkurinn yrði beðinn að fjar­lægja merkingar sínar af kirkjunni.

Anna Guð­rún Sigur­vins­dóttir, for­maður sóknar­nefndarinnar, sagði þá að sam­kvæmt samningi mætti flokkurinn merkja sig við kirkjuna en að­eins við inn­gang rýmisins sem flokkurinn leigir. Hún vill meina að flokkurinn hafi farið að­eins fram úr sér.

Ekki orðið var við óánægju

Þetta kemur flatt upp á Ingu Sæ­land, for­mann flokksins:

„Þetta hlýtur nú að byggjast á ein­hverjum mis­skilningi því við erum hér með þrettándu grein í leigu­samningi sem segir að við höfum heimild í sam­ráði við leigu­sala að setja á okkar kostnað merkingar á fast­eignina, bæði innan og utan­húss á lóðina. Og síðan eigum við að fjar­lægja þær þegar leigu­töku lýkur,“ segir Inga.

Og voru merkingarnar settar upp í sam­ráði við kirkjuna?

„Já, þetta er bara samningur sem er skrifað undir. Þing­lýstur leigu­samningur.“

Spurð út í orð Önnu Guð­rúnar um að flokkurinn hafi að­eins mátt merkja sig við inn­ganginn segir Inga:

„Nei, nei, það er bara sam­komu­lags­at­riði hér sam­kvæmt 13. grein samningsins og ég held að við séum bara al­gjör­lega 100 prósent sátt með það, bæði við og leigu­salinn okkar, sem hefur tekið okkur sér­stak­lega vel.“

Blessaður leigu­samningur

Hún segir að kirkjan hafi ekki beðið flokkinn að fjar­lægja neinar merkingar. „Við höfum ekki verið beðin um neitt slíkt. Bara alls ekki. Þannig ég get ekki annað séð en að við séum bara virki­lega vel­komin og við upp­lifum okkur þannig, ætíð, og erum enda­laust þakk­lát fyrir að fá að vera á þessum fal­lega stað,“ segir Inga.

Sam­bandi sé virki­lega gott milli flokksins og kirkjunnar. „Það hefur aldrei nokkurn tíma styggðar­yrði fallið á milli okkar og ég myndi segja að þessi leigu­samningur okkar sé bara virki­lega blessaður. Við erum bara sátt,“ segir Inga. Ef kirkjan sé virki­lega svo á móti merkingunum hefur hún enga trú á öðru en að málið veðri leyst far­sæl­lega en enginn frá sóknar­nefndinni hafi enn talað við flokkinn um málið.

Eruð þið kristi­legur flokkur?

„Við alla­vega erum kristin, já við erum það. Við fylgjum alla­vega mann­gæsku og kristi­legum gildum. Við viljum koma fram við aðra eins og við viljum að sé komið fram við okkur.“