Vatnsforði Þórisvatns aldrei mælst minni á miðju sumri

Þórisvatn er aðalmiðlunarlón virkjana Landsvirkjunar á Þjórsár- og Tungnaársvæðinu. Vatnið virkar þannig í raun sem stærsti rafgeymir landsins.

„Það hefur aldrei verið minna í Þórisvatni. Það stendur illa, getur maður sagt, innan gæsalappa, nema hvað við missum engan svefn yfir því,“ segir Ragnhildur Sverrisdóttir, upplýsingafulltrúi Landsvirkjunar, í fréttum Stöðvar 2.

Rauða línan efst á grafinu hér fyrir neðan sýnir hvenær Þórisvatn fer á yfirfall en það er í 579 metra hæð yfir sjávarmáli. Bláa svæðið táknar lægstu og hæstu gildi fram til þessa. Gula línan er áætlað meðaltal vatnshæðar, bláa línan síðasta vatnsár og fjólubláa línan núverandi vatnsár. 

Vatnshæðin stendur núna í 569 metrum yfir sjávarmáli, sjö metrum lægra miðað við 576 metra hæð í meðalári um miðjan júlímánuð.

Frá því seinnipartinn í júní hefur vatnshæðin verið fyrir neðan lægstu stöðu sem áður hefur mælst. Landsvirkjunarmenn segja að veðráttan ráði mestu um vatnsbúskapinn, þættir eins og bráðnun jökla, vorflóð og úrkoma.

„Vorið var kalt og þurrt. Þannig að það hefur fyllst hægar en við reiknuðum með og gerist í meðalári.

Hins vegar Hágöngulón er að fyllast. Það eru tveir metrar í að það fari að flæða úr Hágöngulóni í Þórisvatn. Svo þetta horfir allt til betri vegar.“

Ragnhildur segir önnur helstu lón Landsvirkjunar, Hálslón og Blöndulón, standa mun betur en vatnshæð þeirra er núna nálægt meðaltali.

Úr Þórisvatni er hins vegar miðlað til sjö virkjana sem samtals standa undir um helmingi af raforkuframleiðslu Landsvirkjunar og upp undir þrjátíu milljarða króna árlegum sölutekjum raforku. En er ástæða til að óttast vandræði eins og raforkuskort í vetur?

„Við höfum enga trú á því að við lendum í neinum vandræðum. Við reiknum með að öll lón fyllist vel. Og þetta muni ekki hafa nein áhrif á raforkuvinnsluna hjá okkur,“ svarar upplýsingafulltrúi Landsvirkjunar.

Hér má sjá frétt Stöðvar 2: