Fundur hjúkrunar­fræðinga og ríkisins heldur á­fram á morgun

Fundi samninganefnda Félags íslenskra hjúkrunarfræðinga og ríkisins lauk á fimmta tímanum í dag hjá ríkissáttasemjara án niðurstöðu. Fundurinn hófst klukkan tíu og hefur annar fundur verið boðaður í deilunni klukkan 9:30 á morgun. 

Hjúkrunarfræðingar hafa verið samningslausir í fimmtán mánuði og hafa boðað til verkfalls ef ekki nást kjarasamningar klukkan átta á mánudaginn. 

Aðalsteinn Leifsson ríkissáttasemjari segir í samtali við fréttastofu stöðuna snúna og unnið sé að því að leita lausna.