Eldur kviknaði í fjar­skipta­her­bergi Kyndils

Eldur kom upp í húsnæði björgunarsveitarinnar Kyndils í Mosfellsbæ seint í gærkvöldi. Eldurinn kviknaði í fjarskiptaherbergi sveitarinnar og talið er að eitthvað tjón hafi orðið á sendum.

Í tilkynningu frá slökkviliði höfuðborgarsvæðisins segir að slökkvistarf hafi gengið greiðlega.

„Vonandi mun það tjón sem varð á sendum ekki hafa áhrif á símnotendur, þetta á ekki að hafa nein áhrif á tetra þar sem fleiri sendar eru á svæðinu,“ segir í færslu slökkviliðisins á Facebook.

Þá var slökkvilið kallað út vegna heitavatnsleka í Skeifunni. Pottur gleymdist svo á eldavél í Kópavogi og þurfti að reykræsta íbúðina.