Landspítali takmarkar ekki fundi eða samneyti starfsfólks

Starfsfólk Landspítalans hefur hvorki verið beðið um að fresta ónauðsynlegum fundum eða námskeiðum né um að vinna heima hjá sér hafi það kost á þrátt fyrir að fleiri en hundrað starfsmenn séu nú í einangrun eða sóttkví vegna kórónuveirunnar. Helstu aðgerðir spítalans eru heimsóknarbann og tilmæli um að starfsfólk gæti fyllsta hreinlætis.

Fyrirtæki og stofnanir hafa gripið til ýmissa aðgerða til þess að hefta útbreiðslu kórónuveirunnar. Seðlabankinn bað þannig starfsfólk sitt um að vinna heima hjá sér eins og kostur væri í dag. Á sumum vinnustöðum hefur verið gripið til þess ráðs að takmarka samgang ólíkra deilda eða hæða í mötuneyti til að draga úr líkum á að smit berist á milli fólks.

Anna Sigrún Baldursdóttir, aðstoðarmaður forstjóra Landspítalans, segir að ekki hafi verið gripið til neinna slíkra aðgerða á spítalanum til þessa. Námskeið og fundir starfsfólks fari enn fram þá að fjarfundarbúnaður sé notaður eftir því sem við á.

Eins er enn gert ráð fyrir að fólk mæti til vinnu og ekki er gert ráð fyrir neinum breytingum á matsölum spítalans.

„Við teljum ekki þörf á því. Það eru engar vísbendingar fyrir því að það eigi að gera það. Við hins vegar gerum ráð fyrir og ætlumst til að starfsmenn gæti fyllsta hreinlætis þegar þeir sækja sér mat eða borða í matsalnum hjá okkur. Við höfum ekki gripuið til þess að skipta upp, fækka í matsal eða breyta þeim háttum sem við höfum haft undanfarið,“ segir Anna Sigrún með þeim fyrirvara að ástandið geti breyst hratt.

Ekki hefur heldur verið gripið til annarra ráðstafana til að takmarka samgang á milli vakta eða deilda annarra en að forðast að færa starfsfólk á milli húsa ef hægt er að komast hjá því.

Hvað aðrir gera er í þeirra höndum

Spurð að því hvort að önnur fyrirtæki og stofnanir sem hafi gripið til aðgerða af þessu tagi hafi brugðist of hart við segir Anna Sigrún spítalann ekki taka afstöðu til þess.

„Við byggjum allar ákvarðanir um þetta á farsóttanefnd spítalans og hún ákveður hvort við breytum út af þessu. Hvað aðrir gera er auðvitað bara í þeirra höndum,“ segir hún.

Viðbragðsstjórn og farsóttanefnd spítalans taki nær við öllum völdum við aðstæður sem þessar og þær stýri ákvörðun um viðbúnað innan spítalans.

„Þetta er niðurstaða hennar og hún fundar einu sinni á hverjum degi og jafnvel oftar ef það er þörf. Ástandið getur breyst mjög hratt,“ segir Anna Sigrún.

Heimsóknarbanni var komið á hjá spítalanum á dögunum og segir Anna Sigrún að það sé langstærsta aðgerð spítalans til að takmarka útbreiðslu kórónuveirunnar auk þess að ítreka tilmæli til starfsfólks um að stunda hreinlæti.

„Það er langstærsta aðgerðin að fólk sinni örugglega hreinlæti og hér er fólk almennt sérþjálfað í því. Kannski er staðan að einhverju marki öðruvísi hjá okkur en annars staðar. Við erum bara vön mjög miklu hreinlæti og fólk er að sótthreinsa sig við öll möguleg og ómöguleg tilefni,“ segir Anna Sigrún.

Yfir hundrað starfsmenn í einangrun eða sóttkví

Kórónuveiran hefur þegar haft veruleg áhrif á starfsemi Landspítalans. Ellefu starfsmenn eru í einangrun og 92 í sóttkví vegna faraldursins. Um sjötíu aðgerðum hefur verið frestað í Fossvogi af þessum sökum í vikunni og engar valaðgerðir verða gerðar þar fram yfir helgi.

Sjá einnig: Fresta aðgerðum vegna manneklu af völdum veirunnar á Landspítalanum

Alls hafa 109 manns nú greinst með kórónuveiruna á Íslandi. Langflestir þeirra sem hafa greinst komu frá skíðasvæðum í Ölpunum. Innlend smit eru um 24 talsins og um 900 manns eru í sóttkví.

Tveir sjúklingar liggja inni á Landspítalanum vegna Covid-19-sjúkdómsins sem kórónuveiran veldur.