Í gæsluvarðhaldi eftir bílránið í Grafarholti

Karlmaður á fertugsaldri var úrskurðaður í fjögurra vikna gæsluvarðhald í Héraðsdómi Reykjavíkur grunaður um bílrán og ógætilegan akstur. Lögreglan á höfuðborgarsvæðinu gerði kröfu um varðhaldið í dag en maðurinn var handtekinn í austurborginni síðdegis í gær eftir að tilkynning barst um rán á bifreið.

Bifreiðin fannst nokkru síðar í Grafarvogi, sem og ökumaðurinn, en áður höfðu borist nokkrar tilkynningar um mjög ógætilegan akstur mannsins. Tveir aðrir voru enn fremur handteknir í þágu rannsóknar málsins, en þeir eru báðir lausir úr haldi lögreglu.

Maðurinn er í gæsluvarðhaldi á grundvelli almannahagsmuna.

Í tilkynningu frá lögreglu í morgun kom fram að tveir karlmenn og ein kona hefðu í gær rænt bíl af manni, ráðist á hann, tekið farsíma hans og skilið hann eftir slasaðan á vettvangi í Grafarholti. Lögregla handtók fólkið á sjötta tímanum í gær.

Sagði í tilkynningunni að fólkið væri m.a. grunað um rán, þjófnað, nytjastuld bifreiðar, akstur undir áhrifum áfengis og fíkniefna, eignaspjöll og að hafa valdið umferðaróhappi og stungið af.