Elon Musk stóð við loforðið til Íslendinga

Bandaríski rafbílaframleiðandinn Tesla hleypti af stokkunum íslenskum hluta vefsíðu sinnar í morgun. Það gerir Íslendingum kleift að hanna og panta rafbíl frá Tesla sem svo sendir bifreiðina til landsins. 

Samhliða þessu opnar fyrirtækið þjónustumiðstöð fyrir Tesla-bifreiðar á Krókhálsi í Reykjavík, eins og Elon Musk, stofnandi Tesla, greindi frá á Twitter í lok ágúst. Vísir sagði jafnframt frá því í síðustu viku að Tesla áformar, auk opnunar íslensku vefsíðu sinnar og miðstöðvarinnar, að reka hið minnsta þrjár ofurhleðslustöðvar á landinu. Fyrirhugað er að sú fyrsta þeirra verði vígð á næsta ári.

Athafnamaðurinn Gísli Gíslason, sem sjálfur hefur staðið að innflutningi Tesla-bifreiða á Íslandi, birti myndir af sér með starfsmönnum Tesla á Krókhálsi nú í morgun.

Í skeyti til Vísis segir Even Sandvold Roland, talsmaður Tesla í Noregi, að Íslendingar geti því pantað og hannað Tesla-bifreiðar af gerðunum Model S, Model X og Model 3. Grunnverð ódýrastu bifreiðarinnar, Model 3 Standard Range Plus, mun kosta rúma 5,1 milljón króna með virðisaukaskatti og sendingarkostnaði. Áætluð afhending bílanna er á fyrri hluta árs 2020.

Hér að neðan má sjá verðtöflu fyrir Tesla-bifreiðar en nánari upplýsingar má nálgast á vef fyrirtækisins.

Gerð	Drif	Drægni	Verð með VSK og flutningi
Model 3 Standard Range Plus	Afturhjól	409 km	5.122.735 kr
Model 3 Long Range	Aldrif	560 km	6.152.191 kr
Model 3 Performance	Aldrif	530 km	7.144.191 kr
Model S Long Range	Aldrif	610 km	10.988.191 kr
Model S Performance	Aldrif	590 km	13.468.191 kr
Model X Long Range	Aldrif	505 km	12.228.191 kr
Model X Performance	Aldrif	485 km	14.708.191 kr

 

Aurora Borealis
Blue Lagoon
Sustainable energy
Reykjavík service center
Tesla vehicle orders open for Iceland NOW

— Tesla (@Tesla) September 9, 2019