Neistinn orðinn að báli hjá Shawn Mendes og Camilu Cabello

Kanadíski söngvarinn Shawn Mendes og kúbversk-bandaríska söngkonan Camila Cabello sem gáfu á dögunum út sumarsmellinn Señorita hafa undanfarið sést kyssast og haldast í hendur á götum Los Angeles.

Aðdáendur Mendes og Cabello hafa undanfarið tekið eftir því að Cabello sé grunsamlega dugleg að mæta á tónleika Mendes.

Innt eftir svörum hafa Mendes og Cabello hingað til ekki viljað tjá sig um sambandið en þrátt fyrir að það sé tiltölulega nýtt hafa þau verið góðir vinir í langan tíma en vinir söngelska parsins segja að það hafi alltaf verið augljóst að um gagnkvæma hrifningu væri að ræða.

Þannig hefur tímaritið ELLE eftir heimildarmanni að það hefði bara verið tímaspursmál hvenær þau myndu láta til skarar skríða.

„Þau eru bara að kýla á þetta og halda ekkert aftur af sér. Þetta er virkilega spennandi skref í þeirra sambandi fyrir þau bæði. Þau hafa ekki að neinu leyti viljað vera í sundur. Þau eru nánast saman allan sólarhringinn.“

Cabello hætti í síðasta mánuði með þjálfaranum Matthew Hussey en þau höfðu verið saman í rúmt eitt og hálft ár. Síðasta vor komst sá orðrómur á kreik að Mendes væri byrjaður með Hailey Baldwin en það var áður en hún tók aftur saman við söngvarann Justin Bieber.