Níu mánaða fangelsi fyrir að hóta ljósmæðrum með sprautunál

Héraðsdómur Norðurlands eystra hefur dæmt karlmann á þrítugsaldri í níu mánaða fangelsi fyrir að brjótast inn á fæðingardeild sjúkrahússins á Akureyri í mars í fyrra, vopnaður sprautunál.

Maðurinn hótaði tveimur ljósmæðrum á vakt og sagði nálina bera HIV smit. Hann krafðist þess að ljósmæður afhentu honum morfín úr lyfjabirgðum deildarinnar.

Í dómnum kemur fram að brotin séu litin alvarlegum augum þar sem þau beindust að ljósmæðrum við störf á fæðingardeild. Vinnusta þar sem mikilvægt er að allir njóti öryggis og kyrrðar.

Maðurinn er sagður hafa verið mjög illa áttaður þegar brotin áttu sér stað.

Til mildunar er horft til þess að ákærði hefur ekki gerst sekur um önnur ofbeldisbrot. Hann játaði brot sín, hefur greitt bætur vegna verknaðarins, iðrast mjög og hefur tekið af festu á sínum málum í kjölfar atviksins.

Maðurinn var dæmdur í níu mánaða fangelsi þar af sex mánuði skilorðsbundna til þriggja ára.

Hægt er að lesa dóminn hér.