Reyndi að tæla stúlku upp í bíl með því að segja að móðir hennar væri slösuð

Lögreglan á Suðurnesjum leitar nú karlmanns sem reyndi að tæla unga stúlku upp í bifreið sína í Reykjanesbæ. Stúlkan brást hárrétt við er hún hljóp í burtu og lét vita af atvikinu.

Í tilkynningu frá lögreglunni á Suðurnesjum segir að atvikið hafi átt sér stað í gærkvöldi. Maðurinn sagði stúlkunni að móðir hennar væri slösuð eftir umferðarslys og þyrfti því að koma með honum upp í bílinn. Stúlkan brást hins vegar hárrétt við er hún hljóp í burtu og rakleiðis heim þar sem hún lét vita um atvikið.

Leit lögreglu að manninum og bifreiðinni hefur því miður ekki borið árangur, en skráningarnúmerið náðist ekki. Lögreglan á Suðurnesjum biður foreldra að brýna fyrir börnum sínum að fara ekki upp í bifreiðar með ókunnugum og tilkynna strax um atvik sem þetta.