Á­fram hrellir Takata ís­lenska bif­reiða­eig­endur

Bernhard ehf. mun þurfa að innkalla hundruð Honda-bifreiða af árgerðum 2010 til 2015. Um er að ræða alls 576 bifreiðar af gerðunum Accord, Jazz og CR-V.

Á vef Neytendastofu er ástæða innköllunarinnar sögð vera sú að öryggispúðar bílanna gætu verið gallaðir. Um sé að ræða hluta af alþjóðlegri innköllun sem rekja má til loftpúðaframleiðandans Takata.

Upp komst um hina gölluðu Takatapúða árið 2015. Síðan þá hafa milljónir bifreiða um allan heim verið innkallaðar, þar af þúsundir á Íslandi. Það var til að mynda gert í janúar síðastliðnum, þegar Toyota á Íslandi innkallaði alls 2245 bifreiðar. Takata var úrskurðað gjaldþrota árið 2017.

Í tilkynningu Neytendastofu segir að við innköllunina verði skipt um öryggispúða farþegamegin og að viðkomandi bifreiðareigendum verði tilkynnt um innköllunina bréfleiðis.

„Neytendastofa hvetur bifreiðaeigendur til að fylgjast vel með hvort að verið sé að innkalla þeirra bifreiðar og hafa samband við umboðið ef þeir eru í vafa,“ segir á vef stofnunarinnar.