Alda Karen segist njóta víðtæks stuðnings fagfólks

Alda Karen Hjaltalín fyrirlesari segir fjölda fólks, þar af bæði fagfólk úr heilbrigðisgeiranum og aðstandendur fórnarlamba sjálfsvíga, hafa haft samband og lýst yfir stuðningi við sig síðustu daga. Alda Karen hefur verið gagnrýnd harðlega fyrir umdeild ummæli sín um lausn við sjálfsvígum.

Ummælin voru höfð eftir Öldu Karen í þættinum Íslandi í dag á Stöð 2 á mánudag þar sem hún sagði frá væntanlegum fyrirlestri sínum í Laugardalshöll. Hún lýsti því jafnframt yfir að sjálfsvíg væri „stærsti sjúkdómurinn sem skekur mannkynið“ og það væri leiðinlegt því að „lausnin“ væri einföld. „Það er bara setningin „þú ert nóg“.“

Alda Karen svaraði fyrir ummælin í Kastljósi á RÚV í gærkvöldi og sagði þau hafa verið klaufaleg. Hún ítrekaði að hún hefði hlaupið á sig í þættinum Í bítið á Bylgjunni í morgun.

„Ég kem þessu náttúrulega mjög klaufalega frá mér þarna á Stöð 2, að bendla sjálfsvígshugsanir við þetta beint. Þetta var náttúrulega fyrst og fremst meint [þannig] að „ég er nóg“ er minn helsti drifkraftur í lífinu sem ég nefndi náttúrulega í viðtölum á undan,“ sagði Alda Karen.

Þakka henni fyrir að hjálpa fólki

Faglært heilbrigðisstarfsfólk hefur margt gagnrýnt ummæli Öldu Karenar. Þannig gerði Hafrún Kristjánsdóttir sálfræðingur alvarlegar athugasemdir við það í Kastljósi að Alda Karen byði fólki upp á „lífslausnir“ gegn greiðslu. Þá sagði Salbjörg Bjarnadóttir, geðhjúkrunarfræðingur og verkefnastjóri sjálfsvígsforvarna hjá Embætti landlæknis, í samtali við Vísi í gær að engin lausn væri fólgin í því að segja „þú ert nóg“ við manneskju með sjálfsvígshugsanir.

Alda Karen kvaðst skilja þessa gagnrýni fagfólks. Margir í þeim hópi hafi þó haft samband við hana og lýst yfir stuðningi við málflutning hennar.

„Já, algjörlega ég skildi þessa gagnrýni mjög vel. Og fagfólk, einmitt, sem kom sér í samband við mig og reyndar tók þessum orðum ekki þannig, margir. En sumir sem gerðu það og voru kannski hvað háværastir tóku þessu náttúrulega inn á sig líka.“

Hún sagðist jafnframt hafa nýtt sér „lífslykla“ sína til að standa af sér gagnrýnina. Stuðningur úr samfélaginu hafi þó reynst henni best í þeim efnum.

„En það sem hjálpar mér rosalega mikið er að ég er örugglega búin að fá yfir þúsund skilaboð, bæði í gær og í fyrradag, frá fólki sem stendur með mér og er bara þvílíkt jákvætt. Bæði frá fagfólki og frá aðstandendum fórnarlamba sjálfsvíga, og [þeir] eru bara: þú ert greinilega að hjálpa fólki og takk kærlega fyrir það.“

Trúnaður ríkir um „upplifunina“

Alda Karen heldur fyrirlestur sinn í Laugardalshöll þann 18. janúar næstkomandi. Þar hyggst hún svara „spurningum um lífið og heilann“ og fara yfir ýmis málefni sem varða „sjálfsvinnu og að ná hröðum árangri“, að því er fram kemur á miðasölusíðu viðburðarins, en í Bítinu kom fram að fyrirlesturinn væri stílaður inn á ungt fólk. 



Þá kemur fram á vefsíðunni að boðið verði upp á tissjú fyrir þá sem munu annað hvort gráta úr hlátri eða vegna „yfirþyrmandi tilfinningaflóðs“. Einnig er fyrirlesturinn ýmsum skilyrðum háður en ekki er leyfilegt að hafa síma meðferðis á meðan upplifuninni stendur. Þá ríkir trúnaður um það sem fram fer í Laugardalshöll: „Allir áhorfendur eru skuldbundir að gæta fyllsta trúnaðar varðandi upplifunina sem fer fram á viðburðinum.“



Viðtalið við Öldu Karen í Bítinu má hlusta á í heild hér að neðan.