Reynum að draga lærdóm af þessum Evrópuleikjum

Evrópuævintýri Selfyssinga lauk um helgina þrátt fyrir eins marks sigur gegn pólska félaginu Azoty-Pulawy en pólska liðið fer áfram á 60-54 sigri samanlagt.

Er þetta annað árið í röð sem íslenskt lið kemst í 32-liða úrslit EHF-bikarsins þar sem sigur tryggir liðinu þátttökurétt í riðlakeppninni en líkt og FH í fyrra tókst Selfyssingum ekki að komast áfram.

Selfyssingar urðu fyrir áfalli þegar í ljós kom að ungstirnið Haukur Þrastarson gæti ekki tekið þátt í leiknum. Þrátt fyrir ungan aldur hefur Haukur verið einn besti leikmaður liðsins á báðum endum vallarins undanfarið ár og Selfoss þurfti að vinna upp sjö marka forskot. Liðin skiptust á mörkum og var leikurinn hnífjafn allan fyrri hálfleikinn. Í upphafi seinni hálfleiks kom tækifæri Selfyssinga, þeir voru fjórum mörkum yfir og fengu sókn til að komast fimm mörkum yfir en náðu ekki að nýta sér það og þá gengu gestirnir á lagið.

Patrekur Jóhannesson, þjálfari Selfyssinga, var stoltur af sínum mönnum.

„Við vissum að þetta yrði erfitt en við lögðum upp með ákveðið plan og við komumst í færi í byrjun seinni hálfleiks þegar við komumst fjórum mörkum yfir. Þar var tækifærið okkar,“ sagði Patrekur og bætti við:

„Þá sá maður hvað það býr mikil reynsla í þessu pólska liði og hvað þeir eru seigir. Nú er það bara okkar að taka það sem við lærðum út úr þessum Evrópuleikjum og nýta okkur það til framtíðarinnar.“

Hann tók undir að liðið hefði saknað Hauks.

„Við söknuðum Hauks hérna heima vegna meiðsla og svo gat Sverrir ekki verið með okkur úti vegna náms. Þar sást kannski munurinn á atvinnumannaliði og áhugamannaliði sem er raunveruleiki íslenskra liða.“