„Fráleit“ kenning Thomasar en mátun á úlpunni stendur til boða

Sigríður Friðjónsdóttir ríkissaksóknari segir að sú mynd sem Thomas Møller Olsen og verjandi hans reyni að mála af atburðarrásinni sem varð Birnu Brjánsdóttir að bana í janúar á síðasta ári sé „fráleit“. Ákæruvaldið krefst þess að Landsréttur staðfesti dóm héraðsdóms í máli Thomasar.

Þetta kemur fram í greinargerð Sigríðar til Landsréttar vegna aðalmeðferðar á áfrýjun málsins. Fréttastofa hefur greinargerð hennar, sem og greinargerð verjenda Thomasar, undir höndum. Thomas var sem kunnugt er dæmdur í 19 ára fangelsi fyrir hafa orðið Birnu að bana þann 14. janúar 2017. Dóminum var áfrýjað til Landsréttar og í gær var haldið undirbúningsþinghald vegna málsins en dagsetning aðalmeðferðar hefur ekki verið ákveðin.

Sjá einnig: Byggir vörnina á ósamræmi í frásögn Nikolaj og sönnunarskorti um akstur

Í greinargerð ákæruvaldsins segir að ljóst sé að í greinargerð verjandans séu ýmis atriði tínd til til þess að varpa sökinni yfir á Nikolaj Olsen, skipsfélaga Thomasar. Vísir hefur fjallað um greinargerð verjandansog ljóst er að henni er að miklu leyti ætlað að gera Nikolaj tortryggilegan á sama tíma og sekt Thomasar er dregin í efa.

Tekur saman hvernig atburðarrásin var að mati Thomasar

Í greinargerð ákæruvaldsins segir að það sé ljóst eftir lestur á greinargerð verjanda að atburðarrásin umræddan morgun sé að mati Thomasar og verjandans á þá leið að á tuttugu mínútna tímabili hafi Nikolaj, sem Sigríður nefnir að hafi bæði verið ofurölvaður auk þess hann hafi aldrei öðlast ökuleyfi, ekið bílnum sem þeir voru á, á brott með Birnu innanborðs á meðan Thomas varð eftir að pissa í nágrenni golfvallarsins við Hnoðraholt í Garðabæ.

Hafi Nikolaj svo ráðist á Birnu í aftursæti bílsins, klætt hana úr skóm og fötum, losað sig við þá og komið því til leiðar að líkama Birnu var varpað í sjó eða vatn á sunnanverðu Reykjanesi. Að því loknu hafi hann sótt Thomas í nágrenni golfvallarins.

Þá sé einnig gert ráð fyrir því að Nikolaj hafi framkvæmt árásina án þess að blóðdropi kæmi á föt hans, þrátt fyrir að mikið blóð hafi komið frá Birnu við atlöguna í bílnum. Þá sé það einnig kenning Thomasar að Nikolaj hafi farið inn í káetu Thomasar meðan sá síðarnefndi var sofandi, sett vísifingur hægri handar á ökuskírteini Birnu sem fannst um borð í Polar Nanoq. Því næst hafi hann brotið skírteinið saman og sett það í ruslanet, allt til þess að koma sökinni á Thomas.

Segir í greinargerðinni að framangreind atburðarrás sé að mati ríkissaskóknara „fráleit“ og þar með „flest þau atriði sem teflt er fram að hálfu ákærða til stuðnings sýknukröfu í greinargerð hans.“ 

Ekkert gagn að því að rannsaka síma þar sem slökkt var á síma Thomasar

Meðal þess sem sýknukrafa Thomasar er byggð á er það sem verjandi segir að sé skortur á sönnunargögnum um að Thomas hafi yfirhöfuð ekið að Óseyrarbrú til þess að losa sig við líkama Birnu. Þá er einnig dregið í efa að hann hafi getað þekkt þá leið sem lögregla telur að hann hafi farið auk þess sem hún sé í efstu mörkum (149,5 kílómetrar) þess kílómetrafjölda sem lögregla taldi (150 kílómetrar) að Thomas hafi ekið bílnum á milli sjö og ellefu um morguninn.

Í greinargerð ríkissaksóknara segir að nú liggi fyrir að óútskýrður akstur Thomasar sé um 190 kílómetrar en ekki 140-150 kílómetrar líkt og kom fram við aðalmeðferð málsins í héraði. Muninn megi rekja til þess að nú sé lögregla búin að aka og mæla þær leiðir sem óumdeilt sé að Thomas ók er hann hafði bifreiðina á leigu.

Þá sé það Thomasi að kenna að upplýsingar skorti um hvar hann hafi verið á milli sjö og ellefu að morgni 14. janúar þar sem hann hafi neitað að veita þær upplýsingar. Ljóst sé hins vegar að hann gat keyrt að þeim stað sem líkama Birnu var komið fyrir en aðilar málsins draga ekki í efa mat dómskvaðs matsmanns um að það hafi verið gert á Óseyrarbrú.

Einnig segir að ekkert gagn hafi verið í því að hefja rannsókn á símum um borð í bílum sem voru á ferð á leiðinni sem Thomas hafi ekið. Telur verjandi að slík rannsókn hafi getað útilokað það að Thomas hafi verið á þessum slóðum. Bendir ríkissaksóknari hins vegar á að slökkt hafi verið á síma Thomasar, því verði ekki séð hvaða þýðingu slík rannsókn hefði haft. 

Mat tæknimanna að úlpan í Medium-stærð sé hæfileg fyrir Thomas

Meðal sönnunargagna í málinu er úlpa af gerðinni Quartz Nature í stærð M. Fannst hún blóðug um borð í togaranum Polar Nanoq. Í gær var greint frá því að til stæði að Thomas myndi máta úlpuna til þess að sjá hvort að hann passaði í hana. Í greinargerð verjanda kemur meðal annars fram að þar sem Thomas sé 188 sentímetrar á hæð og þrekvaxinn myndi hann ekki festa kaup á úlpu í þeirri stærð, því sé úlpan ekki hans. Hann eigi hins vegar samskonar úlpu en í stærðinni XL.

Sjá einnig: Verjandi segir ólíklegt að Thomas Møller Olsen passi í úlpu í stærð M

Ákæruvaldið heldur því fram að Thomas hafi verið klæddur úlpunni í stærð M þegar hann fór um borð í Polar Nanoq um klukkan ellefu þann 14. janúar 2017. Úlpan fannst í klefa hans. Í greinargerð ríkissaksóknara segir að það sé mat tæknideildar að umrædd úlpa sé í hæfilegri stærð fyrir karlmann með svipaða líkamsbyggingu, hæð og þyngd og Thomas.

Því standi honum til boða að fara í úlpuna við aðalmeðferð málsins til þess að skera úr um hvort hann passi í úlpuna eða ekki.