Boðað til fundar í kjaradeilu flugvirkja og Icelandair

Ríkissáttasemjari hefur boðað til fundar í kjaradeilu Flugvirkjafélag Íslands, Icelandair og Samtaka atvinnulífsins nú síðdegis. Fundurinn hefst klukkan fimm í húsnæði Ríkissáttasemjara.

Verkfall flugvirkja Icelandair hófst klukkan sex í morgun eftir að upp úr slitnaði í viðræðum deiluaðila í nótt.

Alls hefur um tuttugu flugferðum til og frá Íslandi verið aflýst vegna verkfallsins auk þess sem að seinkun varð á öllum flugferðum Icelandair frá Íslandi í morgun.

Í samtali við Vísi fyrr í dag sagði Halldór Benjamín Þorbergsson, framkvæmdastjóri Samtaka atvinnulífsins að langt væri milli deiluaðila en staðan væri þannig að deiluaðilar yrði að komast að samkomulagi sem fyrst, svo aflýsa mætti verkfallinu.