Gefur ekki skýr svör um aðkomu Viðreisnar að starfsstjórn fyrr en eftir helgi

Benedikt Jóhannesson, formaður Viðreisnar, sagðist ætla að taka ákvörðun um það yfir helgina hvort Viðreisn taki þátt í starfsstjórn skipaðri ráðherrum fráfarandi ríkisstjórnar. Hann sagði flokkinn fara vel stemmdan inn í kosningarnar en hefði viljað vita af því að Björt framtíð hygðist slíta stjórnarsamstarfinu.

Starfsstjórnir eru samkvæmt skilgreiningu skipaðar ráðherrum fráfarandi ríkisstjórnar. Starfsstjórnin sem tekur nú við stjórnartaumnum mun sitja til bráðabirgða þar til gengið verður til kosninga og gegna daglegri stjórn og skyldum.

Eftir fund sinn með forseta í dag sagði Benedikt að Viðreisn myndi að minnsta kosti taka þátt í starfsstjórninni nú um helgina.

Meirihlutasamstarfinu lokið

Ráðgjafaráð Viðreisnar ályktaði í gær um að núverandi forsætisráðherra og dómsmálaráðherra geti ekki setið áfram á ráðherrastólum á meðan „upplýst er að fullu um þann trúnaðarbrest sem orðinn er.“ Um áframhaldandi samstarf með fyrrnefndum ráðherrum í starfsstjórn ítrekaði Benedikt í dag að meirihlutasamstarfi ríkisstjórnarinnar væri lokið.

„Enginn situr þarna í umboði okkar, það er alls ekki þannig. Þessu meirihlutasamstarfi er lokið, við erum ekki lengur að tala um neitt samstarf af því tagi, það verða væntanlega ekki haldnir einu sinni ríkisstjórnarfundir en ég sagði forsetanum að ég myndi gefa honum endanlegt svar eftir helgina.“

Sjá einnig: Viðreisn vill forsætisráðherra og dómsmálaráðherra burt

Þá sagði hann að hætta yrði „leyndarhyggju“ í málaflokknum. Skoðun Viðreisnar sé að halda eigi á lofti gagnsæi. Hinn eiginlegi trúnaðarbrestur hafi verið að halda leynd yfir skjölum sem eigi að vera opinber.

Gefa svör eftir eftir helgi um starfsstjórn en fara vel stemmd í kosningar

Benedikt sagðist enn fremur myndu gefa forsetanum svar eftir helgi um það hvort Viðreisn hygðist starfa í starfsstjórn vikurnar í aðdraganda fyrirhugaðs kosningadags 4. nóvember. Hann sagði formenn stjórnmálaflokkanna nú þurfa að ræða málin sín á milli.

Þá sagði Benedikt að Viðreisn færi „vel stemmd“ inn í kosningarnar þrátt fyrir að skoðanakannanir sýndu fram á að fylgi flokksins færi dvínandi. Hann lagði áherslu á að kerfisbreytingar komist ekki á nema að nýir flokkar fái mikið fylgi í kosningum.

Þar vísaði hann til orða forsætisráðherrans, Bjarna Benediktssonar, á blaðamannafundi í Valhöll í gær. Þar sagði Bjarni engar líkur á að sterk ríkisstjórn fengist með fjölmarga smáflokka sem hefðu „engar rætur, enga sögu og engan strúktúr.“

Hafa ekki skoðað bandalag með Bjartri framtíð

Benedikt sagði Viðreisn ekki hafa skoðað kosningabandalag með Bjartri framtíð en sagði þó samstarf innan ríkisstjórnarinnar hafa verið gott þó að hún hefði verið ósammála um margt.

Hann sagðist enn fremur vera í talsambandi við formenn alla stjórnmálaflokka á Alþingi, ekki bara formenn fyrrverandi samstarfsflokka.

Hefði viljað vita af fundi Bjartrar framtíðar

Þá var Benedikt spurður að því hvort Viðreisn hefði slitið ríkisstjórnarsamstarfinu ef Björt framtíð hefði ekki tekið af skarið. Benedikt sagði að ekkert þýddi að segja „hvað hefði gerst“ í þessu samhengi. Hann sagðist enn fremur hafa viljað vita af því að Björt framtíð hygðist halda fund þar sem kjósa ætti um stjórnarslit.

Að sögn Benedikts skoðaði Viðreisn enn fremur möguleikann á því að mynd annars konar ríkisstjórn með sitjandi flokkum á Alþingi. Hann sagði íhaldssaman arm Sjálfstæðisflokksins hafa verið einna erfiðastan í samstarfi en lagði áherslu á að allir þyrftu að tala saman, út á það gengju stjórnmál.

Beina útsendingu Vísis frá fundi forseta Íslands með formönnum stjórnmálaflokkanna á Bessastöðum má sjá hér. Síðasti fundur dagsins, fundur forseta með Loga Má Einarssyni, formanni Samfylkingarinnar, verður haldinn nú klukkan 16:45.