Chelsea getur fengið Aubameyang fyrir 70 milljónir punda

Englandsmeistararnir í Chelsea eru að leita sér að nýjum framherja og ef þeir eru tilbúnir að borga vel þá er möguleiki að einn heitasti framherji Evrópu spili á Stamford Bridge í vetur.

Chelsea er mögulega að fara að missa Diego Costa og félagið missti ennfremur af Romelu Lukaku til Manchester United í vikunni. Það er því ljóst að Englendingsmeistararnir þurfa því að fjárfesta í framherja.

Hjá Borussia Dortmund spilar eftirsóttur framherji en Pierre-Emerick Aubameyang hefur raðað inn mörkum með þýska liðinu á síðustu árum.

Dortmund hefur nú boðið Chelsea Pierre-Emerick Aubameyang fyrir 70 milljónir punda samkvæmt heimildum Sky Sports.

Chelsea hefur einnig sýnt Alvaro Morata, framherja Real Madrid, áhuga en knattspyrnustjórinn Antonio Conte vill fá einhvern annan í framlínu liðsins heldur en Diego Costa.

Það sauð upp úr hjá Conte og Costa í vetur þrátt fyrir flotta frammistöðu Costa og fullt af mörkum á meistaratímabili. Eftir tímabilið sendi Conte síðan Diego Costa skilaboð þar sem kom fram að Costa væri ekki inn í framtíðarplönum ítalska stjórans.

Diego Costa er reyndar ekki farin frá félaginu ennþá og svo gæti farið að þeir sættist fyrir tímabilið.

Pierre-Emerick Aubameyang skoraði 40 mörk í 46 leikjum í öllum keppnum með Borussia Dortmund á síðustu leiktíð og var þá að hækka markaskor sitt á þriðja tímabilinu í röð.

Aubameyang er orðinn 28 ára gamall en hann spilar með landsliði Gabon þrátt fyrir að vera fæddur í Frakklandi. Leikmaður á eftir þrjú ár af samningi sínum við Dortmund en nú gæti verið hans tími til að komast að hjá stærra félagi.  

Það er vitað af áhuga ítalska liðsins AC Milan og franska liðsins Paris Saint Germain en nú er bara að sjá hvort Chelsea sé tilbúið að eyða 70 milljónum punda eða 9,7 milljörðum íslenskra króna í leikmanninn.