Pósturinn fær ekki að fella niður afslátt

Fyrirhugaðri niðurfellingu viðbótarafsláttar Íslandspósts til söfnunaraðila hefur verið frestað. Þetta var gert með bráðabirgðaákvörðun Póst- og fjarskiptastofnunar (PFS). Framkvæmdastjóri Félags atvinnurekanda (FA) fagnar ákvörðuninni.

Söfnunaraðilar eru fyrirtæki á borð við Burðargjöld og Póstmarkaðinn en þau sjá um að safna pósti frá stórnotendum, sortera hann og miðla áfram til Íslandspósts. Síðastnefnda fyrirtækið hefur einkarétt á dreifingu bréfa undir 50 grömmum.

Íslandspóstur tilkynnti aðilum ákvörðun sína 7. apríl síðastliðinn og átti afslátturinn að falla niður frá og með 1. september. Niðurstaða PFS er í samræmi við fyrri ákvarðanir stofnunarinnar um að söfnunaraðilar ættu að njóta viðbótarafsláttar frá gjaldskrá Íslandspósts.

„Við fögnum ákvörðuninni en þetta er eiginlega yfirgengileg ósvífni af hálfu Póstsins. Blekið var varla þurrt á sátt Íslandspósts við Samkeppniseftirlitið, sem átti að stuðla að skárri samkeppnisháttum fyrirtækisins, þegar það ákvað að afnema viðbótarafsláttinn,“ segir Ólafur Stephensen, framkvæmdastjóri FA.

„Það hlýtur að vera hlutverk stjórnar Íslandspósts, sem fjármálaráðherra skipar, og eftir atvikum þeirrar eftirlitsnefndar sem Samkeppniseftirlitið hefur sett til að hafa eftirlit með því að sáttin sé haldin, að tryggja að stjórnendur fyrirtækisins haldi sig innan ramma laga og reglna og starfi í sátt við umhverfi sitt. Þetta mál sýnir að sáttin virðist litlu hafa breytt um framgöngu þeirra gagnvart keppinautum.“