Innkaupakerrur fá spjöld vegna slysa

Með spjaldi með texta og mynd í innkaupakerrum má draga úr slysum sem verða þegar börn detta úr innkaupakerrum. Þetta er niðurstaða nýrrar meistararitgerðar í sálfræði sem Árni Þór Eiríksson skrifaði.

Niðurstöðurnar hafa nú þegar leitt til þess að breytingar hafa verið gerðar í nokkrum verslunum. „Það eru nú þegar komnar merkingar í tveimur verslunum og verið er að vinna að langtímamerkingu í þriðju versluninni,“ segir Árni. „Við erum í viðræðum við fullt af verslunum.“

Árlega slasast um 100 börn á Íslandi við að detta úr innkaupakerrum. Markmið rannsóknarinnar var að athuga hvort hægt væri að hafa áhrif á þá hegðun að foreldrar settu börn sín ofan í innkaupakerrur með því að koma fyrir spjaldi með mynd í innkaupakerrum fjögurra verslana á höfuðborgarsvæðinu. Meiðslin sem börn geta hlotið af falli úr innkaupakerru eru sambærileg meiðslum sem fullvaxinn karlmaður getur orðið fyrir við fall af bílskúrsþaki.

„Það er oft verið að setja krakka í aðstæður sem foreldrar gera sér í raun og veru ekki grein fyrir að séu hættulegar. Það er helsti vandinn. Það er hættan þegar þessi slys verða hversu slæm þau geta orðið. Það eru dæmi um virkilega alvarleg slys þar sem börn duttu úr innkaupakerrum,“ segir Árni.

„Með þessu inngripi (spjaldi) er verið að nota aðferðir sem hafa verið notað víðs vegar í heiminum en aldrei í þessum tilgangi, að minnka líkur á ákveðinni hegðun í svona stórum stíl,“ segir hann.

Niðurstöður rannsókna sýna að spjald með texta og mynd virkar betur en spjald með mynd eða táknmynd. Árni segir þó þörf á frekari rannsóknum. „Eins og staðan er í dag er ekki til nóg af rannsóknum til að við getum alhæft um niðurstöðurnar. Það er í vinnslu sem og viðræður við fleiri verslanir til að taka þátt.“