Sameiginlega lokahófið slegið út af borðinu vegna „óviðráðanlegra orsaka“

Formaður handknattleiksdeildar Aftureldingar segir að vegna óviðráðanlegra orsaka hafi ekki hægt að verða við bón kvennaliðs félagsins um að halda sameiginlegt lokahóf með karlaliðinu. Stjórnin hafi fundað með leikmönnum kvennaliðsins í gærkvöldi þar sem andrúmsloftið var hreinsað og „misskilningur leiðréttur.“

Þetta kemur fram í tilkynningu frá handknattleiksdeildinni sem birt var á heimasíðu Aftureldingar í gærkvöldi.

Íris Kristín Smith, leikmaður kvennaliðsins, skýrði frá því á Twitter að kvöldi föstudagsins 12. maí, kvöldið sem lokahóf karlaliðsins fór fram, að stjórnin hefði ákveðið að halda lokahóf fyrir karlaliðið en ekki kvennaliðið.

Stjórnin að halda lokahóf fyrir mfl karla, en það var ekki möguleiki að halda lokahóf fyrir okkur stelpurnar... #handbolti #þreytt

— Íris Kristín Smith (@Irisksmith) May 12, 2017

Ítrekaði hún þetta í viðtali við Nútímann.

„Þetta er óþolandi, að við þurfum alltaf að vera eftir og fáum aldrei að vera með,“ segir Íris.

Inga Lilja Lárusdóttir, formaður Handknattleiksdeildar Aftureldingar og formaður meistaraflokksráðs kvenna sagði í framhaldinu við Vísi að lokahóf yrði haldið fyrir stelpurnar eins og strákana.

Í tilkynningunni segir að leikmaður kvennaliðsins hafi óskað eftir því í lok apríl fyrir hönd liðsins að lokahófið yrði sameiginlegt hjá strákunum og stelpunum.

„Vegna óviðráðalegra orsaka var ekki hægt að verða við þeirri ósk og fór lokahóf  karlaliðsins  fram um síðustu helgi,“ segir í tilkynningunni. Ekki er útskýrt nánar hverjar óviðráðanlegu orsakirnar eru.

Stjórn handknattleiksdeildar Aftureldingar áréttar að alltaf hafi staðið til að halda lokahóf meistaraflokks kvenna þann 24. maí næstkomandi. Sama kvöld fer lokahóf HSÍ fram.

Misskilningur leiðréttur

„Skortur á samskiptum varð þess valdandi að óvissa virðist hafa skapast um lokahófið. Stjórn meistaraflokksráðs kvenna harmar að hafa ekki staðið betur að upplýsingagjöf til leikmanna.“

Haldinn hafi verið  fundur með leikmönnum meistaraflokks kvenna í gærkvöldi þar sem þessi misskilingur var leiðréttur.   

„Fundurinn var hreinskiptur og voru leikmenn og aðstandendur liðsins sammála að fundi loknum að snúa bökum saman og vinna að því að efla enn frekar umgjörðina í kringum kvennahandboltann í Aftureldingu en aðeins fjögur ár eru síðan að meistaraflokksráð kvenna var stofnað.“

Þá er tekið fram að rekstur meistaraflokksráðs karla og kvenna er aðskilinn. Hins vegar telji stjórn handknattleiksdeildar Aftureldingar að brýnt sé að efla samstarf á milli ráðanna.

„Kjarni málsins er sá að alltaf má gera betur og mun stjórn handknattleiksdeildar Aftureldingar ekki láta sitt eftir liggja í þeirri vinnu.“

Tilkynninguna má lesa í heild hér að neðan

Vegna fréttaflutnings um lokahóf meistaraflokks karla og kvenna í handknattleiksdeild Aftureldingar vill stjórn deildarinnar koma eftirfarandi á framfæri:

Síðastliðinn sunnudag var birt frétt á vefmiðlinum Nútímanum undir fyrirsögninni: Afturelding heldur aðeins lokahóf fyrir meistaraflokk karla, ekki kvenna. Vitnað er í leikmann meistaraflokks kvenna sem lýsir óánægju sinni með störf handknattleiksdeildar Aftureldingar. Leikmaðurinn hafði óskað eftir því í lok apríl fyrir hönd kvennaliðsins að haldið væri sameiginlegt lokahóf karla- og kvennaliðs félagsins í handbolta. Vegna óviðráðalegra orsaka var ekki hægt að verða við þeirri ósk og fór lokahóf karlaliðsins fram um síðustu helgi.

Stjórn handknattleiksdeildar Aftureldingar vill árétta að alltaf stóð til að halda lokahóf meistaraflokks kvenna þann 24. maí næstkomandi. Skortur á samskiptum varð þess valdandi að óvissa virðist hafa skapast um lokahófið. Stjórn meistaraflokksráðs kvenna harmar að hafa ekki staðið betur að upplýsingagjöf til leikmanna.

Haldin var fundur með leikmönnum meistaraflokks kvenna í gærkvöldi þar sem þessi misskilingur var leiðréttur. Fundurinn var hreinskiptur og voru leikmenn og aðstandendur liðsins sammála að fundi loknum að snúa bökum saman og vinna að því að efla enn frekar umgjörðina í kringum kvennahandboltann í Aftureldingu en aðeins fjögur ár eru síðan að meistaraflokksráð kvenna var stofnað.

Rétt er að taka fram að rekstur meistaraflokksráðs karla og kvenna er aðskilinn. Hins vegar telur stjórn handknattleiksdeildar Aftureldingar að brýnt sé að efla samstarf á milli ráðanna.

Kjarni málsins er sá að alltaf má gera betur og mun stjórn handknattleiksdeildar Aftureldingar ekki láta sitt eftir liggja í þeirri vinnu.

Með handboltakveðju,

Inga Lilja Lárusdóttir

formaður handknattleikdeildar