„Ekki stendur steinn yfir steini af hinni margrómuðu stefnu bankans frá 2010. Stefnu sem hefur dregið hagnað af reglulegum rekstri niður í 5-6%, selt eignir í lokuðu ferli og keypt eina dýrustu lóð landsins við Hörpu undir nýjar aðalstöðvar,“ segir Andri í pistlum sem hann ritar á Eyjunni.
Landsbankinn sem er 98 prósent í eigu ríkisins, hagnaðist um tæpa 30 milljarða eftir skatta en 39 milljarða fyrir skatta. Það segir ekki alla söguna því samkvæmt ársreikningi nam virðisrýrnun útlána 20 milljörðum. Þá seldi bankinn alla hluti sína í Valitor Holding hf., Borgun hf., IEI slhf. og 9,9% eignarhlut sinn í Framtakssjóði Íslands slhf á árinu 2014.
Því var arðsemi bankans af reglulegri starfsemi hans ekki nema 5 til 6 prósent. Þetta er talsvert undir arðsemi 100 stærstu fyrirtækja á Íslandi árið 2013 en hún var 9 prósent.
Andri bendir á að hreinar vaxtatekjur hafi dregist saman um 18 prósent á árinu, launakostnaður hækkað um 10 prósent eða sem svarar til 90.000 króna hækkun á mánuði á hvert stöðugildi.
Verkfræðingurinn segir stöðu bankans ekki góða, sérstaklega ekki skömmu áður en ríkið hyggst selja hlut í bankanum. „Því miður hefur Landsbankinn tapað dýrmætum tíma sem samkeppnisaðilar hafa notað vel til að styrkja stöðu sína. Landsbankamenn hafa sofið á verðinum, enda þarf ekki að hafa mikið fyrir hlutunum þegar hægt er að stóla á 20 milljarða króna árlegan hagnað af uppfærslu lánasafna sem keypt voru á „afslætti“,“ segir Andri.
Hann bætir við að slíkur tekjustofn sé ekki sjálfbær og því hljóti menn að spyrja sig hvernig brúa eigi tekjutapið þegar uppfærslu á lánasöfnum lýkur og hagnaður af sölu Borgunar, Valitors, Prómens og annarra eigna þurrkast upp.
„Hvernig á þá að fjármagna 10% hækkun á launakostnaði,“ spyr Andri.
Þá bendir Andri á að á undanförnum mánuðum hafi verið unnið að endurskoðun á stefnu bankans með erlendu ráðgjafarfyrirtæki.
„Það eru alltaf veikleikamerki þegar stjórnir viðurkenna að ráða þurfi ráðgjafa við hlið stjórnenda til að finna tækifæri til úrbóta. Til hvers eru stjórnendum borguð laun? Það er yfirleitt mun ódýrara að ráða stjórnendur með rétta þekkingu og reynslu en að styðjast við ráðgjafa,“ segir Andri.
Bankastjórinn segir að auka verði arðsemi
Steinþór Pálsson, bankastjóri Landsbankans segir í skýrslu stjórnar bankans að auka þurfi arðsemi hans, 5-6 prósent arðsemi af reglulegum rekstri sé of lítið. Bankasýsla ríkisins hafði því sett bankanum það markmið að arðsemi af reglubundnum rekstri verði yfir 10 prósent á næstu fjórum árum. Þetta á að gera með lækkun kostnaðar og aukningu þjónustutekna.
