Sam­þykktu tíu milljarða arð­greiðslu sama dag og greint var frá upp­sögnum

Kvika veitir meðal annars fjármálaþjónustu undir merkjum Auðar, Aurs, Lykils og Netgírós en er sömuleiðis fjárfestingarbanki.

„Í dag áttu sér stað 11 sársaukafullar uppsagnir og jafnframt hefur verið tekin ákvörðun um að ráða ekki í stöður sem hafa losnað og munu losna á næstu mánuðum. Fækkun starfsfólks hefur náð til nánast allra eininga bankans,“ sagði í tilkynningu Kviku fyrr í dag.

Breytt og krefjandi umhverfi var sagt kalla á stöðugt aðhald í rekstri, þrátt fyrir umtalsverðan vöxt á flestum sviðum bankans.

„Gert er ráð fyrir að þessi fækkun stöðugilda muni leiða til kostnaðarlækkunar sem nemur tæplega 400 milljónum króna á ársgrundvelli. Einskiptiskostnaður vegna uppsagna nemur rúmlega 100 milljónum króna, sem gjaldfærðar verða á öðrum fjórðungi ársins.“

Högnuðust um tæpa tvo milljarða á fyrsta ársfjórðungi

Stjórnendur Kviku greindu frá því 12. maí að hagnaður af áframhaldandi starfsemi samstæðunnar fyrir skatta hafi numið 1,8 milljörðum króna á fyrsta ársfjórðungi þessa árs. Var þetta 158 prósenta aukning frá sama tímabili í fyrra. 

Þá sagði Ármann Þorvaldsson, forstjóri Kviku, að fyrsti ársfjórðungur hafi verið mjög góður í rekstri bankans, vaxtatekjur haldið áfram að aukast, kostnaðaraðhald farið að skila sér og áfram væri góður vöxtur í lykilþáttum starfseminnar.

Samhliða árshlutauppgjörinu í maí var tilkynnt að stjórn bankans hefði boðað til hluthafafundar þann 4. júní þar sem áðurnefnd arðgreiðsla yrði lögð til. Tillagan var svo samþykkt í dag með öllum greiddum atkvæðum, að því er fram kemur í tilkynningu.

„Á aðalfundi 18. mars kom fram að eiginfjárstaða félagsins yrði áfram mjög sterk og að stjórn myndi meta frekari útgreiðslur síðar á árinu. Í ljósi þess að samruni Kviku og Arion banka verður ekki að veruleika er nú til staðar aukið svigrúm til að skila fjármunum til hluthafa,“ sagði um arðgreiðsluna í tilkynningu til Kauphallar í maí. 

Í júlí 2025 tilkynntu forsvarsmenn Arion banka og Kviku að bankarnir ætluðu að hefja samrunaviðræður. Fallið var frá sameiningu eftir að bankarnir áttu forviðræður við Samkeppniseftirlitið. Kvika gekk frá sölu á tryggingafélaginu TM til Landbankans í fyrra.  

Til stendur að greiða arðinn út til hluthafa 10. júní.

Fréttin er í vinnslu.