Óskað eftir frekari gögnum í máli hjúkrunarfræðingsins

Fyrirtaka í máli hjúkrunarfræðingsins sem ákærður er fyrir manndráp af gáleysi fór fram öðru sinni í Héraðsdómi Reykjavíkur í dag. Óskað var eftir frekari gögnum, meðal annars sjúkragögnum hins láta. Boðað var til milliþinghalds þar sem Páll Matthíasson, forstjóri Landspítalans, mun bera vitni í málinu og lýsa yfir afstöðu spítalans. Aðalmeðferð málsins fer fram í Héraðsdómi Reykjavíkur á næsta ári.

Hjúkrunarfræðingurinn lýsti yfir sakleysi sínu við fyrirtöku málsins hinn 24.júní síðastliðinn og gerði Landspítalinn hið sama. Þá hafnaði hjúkrunarfræðingurinn bótakröfu líkt og lögfræðingur spítalans fyrir hönd hans.

Ríkissaksóknari lagði fram ákæru á hendur Landspítalanum og hjúkrunarfræðingi gjörgæsludeildar í maí síðastliðnum fyrir manndráp af gáleysi. Er hjúkrunarfræðingurinn sakaður um röð mistaka sem dró sjúkling til dauða árið 2012. Samkvæmt niðurstöðum rannsóknar spítalans ollu margir samverkandi þættir mistökunum, en það er algengasta ástæða mistaka í heilbrigðiskerfinu.

Aldrei fyrr hefur starfsmaður Landspítalans, né Landspítalinn, verið ákærð fyrir atvik af þessu tagi. Landspítalinn úthlutaði hinum ákærða lögmanni ásamt því að hafa sinn eigin lögmann. Landspítalinn standi þó með hinum ákærða.

Mistök hjúkrunarfræðingsins áttu sér stað á kvöldvakt sem hún vann í beinu framhaldi af dagvakt. Hjúkrunarfræðingnum er meðal annars gefið að sök að hafa láðst að tæma loft úr kraga barkaraufarrennu þegar hún tók hinn látna úr öndunarvél.

„Ákærðu var vel kunnugt um að henni bar að tæma loftið úr kraganum, líkt og vinnulýsing um notkun talventilsins kveður á um,“ kemur fram í ákærunni og urðu afleiðingarnar þær að fall varð á súrefnismettun og blóðþrýstingi sjúklingsins með þeim afleiðingum að hann lést skömmu síðar.

Einnig er hún sökuð um að hafa brugðist tilkynningaskyldu með því hafa ekki látið þann hjúkrunarfræðing sem varð eftir á stofu sjúklingsins vita að hún hafi sett á hann talventil. „Þessi vanræksla ákærðu stuðlaði enn frekar að því að mannsbani hlaust af gáleysi hennar.“

Er hjúkrunarfræðingurinn krafin um á fimmtándu milljón króna frá aðstandendum hins látna, þar á meðal vegna kostnaðar við útför hans.