Aron gerði þriggja ára samning við Kolding

Aron Kristjánsson, landsliðsþjálfari karla í handbolta, er búinn að gera þriggja ára samning við danska meistaraliðið KIF Kolding en hann var kynntur til leiks hjá félaginu á blaðamannafundi í Kaupmannahöfn í dag.

Aron tók við liðinu vegna veikinda þjálfara þess á miðri síðustu leiktíð og vann bæði danska meistaratitilinn og danska bikarinn með því. Fljótlega lýsti KIF Kolding yfir áhuga á að halda Aroni áfram og er það nú orðið staðfest.

Hann var kynntur til leiks ásamt tveimur aðstoðarþjálfurum sínum, Dananum HenrikKronborg og Bosníumanninum BilalSunam. KIF æfir og keppir á tveimur stöðum og er því mikilvægt fyrir Aron að vera með góða menn í kringum sig.

„Ég er mjög ánægður með þetta,“ sagði Aron á blaðamannafundinum í dag þegar JensBoesen, forseti félagsins, hætti loksins að tala og rétti Aroni hljóðnemann.

„Það var gaman að vinna tvo titla í fyrra. Liðið stóð sig alveg frábærlega, en í því var mikill sigurvilji og við unnum báða þá titla sem í boði voru í Danmörku. Þjálfaraliðið vann vel saman og ég vil líka þakka öllum áhorfendunum. Ég hlakka til næstu þriggja ára,“ sagði Aron.

Aron missir nokkra sterka leikmenn úr liðinu en á fundinum voru kvaddir þeir SörenWestphal, StefanHundstrup, spænski hornamaðurinn AlbertRocas og hinn litríki JoachimBoldsen sem leggur nú skóna á hilluna.

Aftur á móti voru kynntir þrír nýir leikmenn félagsins; MarcusCleverley, MartinDalk og hornamaðurinn MagnusLandin, bróðir landsliðsmarkvarðarins NiklasLandin.

Aron mun áfram starfa sem landsliðsþjálfari Íslands en hann er með samning fram til 2016.