Lippi orðaður við Bayern

Fréttir frá Ítalíu herma að forráðamenn Bayern München muni á næstu dögum funda með Marcello Lippi.

Ottmar Hitzfeld mun stíga af stóli sem þjálfari þýska liðsins eftir tímabilið og er það í leit að eftirmanni hans.

Lippi hefur verið í fríi frá þjálfun síðan hann stýrði ítalska landsliðinu til heimsmeistaratitils sumarið 2006. Þessi 59 ára þjálfari neitaði tilboði frá Birmingham en er þó tilbúinn að fara að þjálfa á ný.

Hollendingurinn Marco van Basten hefur einnig verið orðaður við þjálfarastöðuna hjá Bayern en hann mun hætta með hollenska landsliðið eftir Evrópumótið næsta sumar.