ÍF stendur í ströngu á morgun

Á morgun, laugardag, mun Íþróttasamband fatlaðra standa að tveimur mótum. Íslandsmót ÍF í frjálsum íþróttum utanhúss mun fara fram á Laugardalsvelli og Bikarkeppni ÍF í sundi mun fara fram í íþróttamiðstöðinni í Grafarvogi.

Þá munu tveir fatlaðir keppendur taka þátt á Íslandsmóti WPC í bekkpressu sem fram fer í nýju Intersport versluninni í Lindum í Smárahverfinu í Kópavogi.

Íslandsmót ÍF í frjálsum íþróttum hefst á Laugardalsvelli laugardaginn 7. júní kl. 9.30 og verður keppt í 100m. og 200m. hlaupi, kúluvarpi, langstökki og hástökki.

Bikarmót ÍF í sundi fer fram í Grafarvogslaug laugardaginn 7. júní og hefst keppni kl. 12 að hádegi og lýkur um kl. 14.

Þá verður lyftingamót WPC á Íslandi í nýju Intersport versluninni hjá Lindum í Kópavogi á laugardag og hefst keppni kl. 14:00. Tveir keppendur úr röðum fatlaðra munu taka þátt í mótinu en það eru þeir Þorsteinn Magnús Sölvason sem verður á meðal keppenda á vegum ÍF á Ólympíumótinu í Peking dagana 6.-17. september síðar á þessu ári og Vignir Unnarsson.

Vignir gerði garðinn frægan á Alþjóðaleikum Special Olympics sem fram fóru í Shanghai á síðasta ári. Þorsteinn er Íslandsmeistari í flokki ófatlaðra hjá WPC í sínum þyngdarflokki, -75kg. og er hann margfaldur Íslandsmeistari og Íslandsmethafi í flokki fatlaðra.