Barcelona talið líklegt til að hreppa Eið Smára

Nú gerist sá orðrómur æ háværari á Englandi og á Spáni að landsliðsfyrirliðinn Eiður Smári Guðjohnsen gangi í raðir Spánarmeistara Barcelona í sumar. Ekkert hefur fengist staðfest í þessum efnum enn sem komið er, en talið er að kaupverð og launakjör gætu orðið spænska liðinu fjötur um fót.

Spænskir fjölmiðlar hafa logað af slúðri um Eið Smára að undanförnu, en Barcelona leitar nú að eftirmanni sænska framherjans Henrik Larsson. Nokkur blöð ganga svo langt að fullyrða að samningaviðræður milli Barcelona og Chelsea standi yfir og að staðfestra frétta sé jafnvel að vænta á allra næstu dögum.