Yao Ming gæti misst úr hálft ár

Carroll Dawson, framkvæmdastjóri Houston Rockets, segir að kínverski miðherjinn Yao Ming þurfi að gangast undir uppskurð eftir að hann fótbrotnaði í leik gegn Utah Jazz í fyrrinótt og verði væntanlega frá keppni í fjóra til sex mánuði í kjölfarið. Þetta þýðir að Ming verður varla kominn almennilega í gang með liði Houston á ný fyrr en halla tekur í næstu jól.

Lið Houston hefur byggt að mestu á ofurstjörnum sínum þeim Tracy McGrady og Yao Ming á undanförnum árum, en þeir voru báðir í miklum meiðslum í vetur og árangur liðsins eftir því. McGrady á við þrálát bakmeiðsli að stríða og virðist eiga mjög erfitt að ná sér að fullu. Það vakti því skiljanlega litla kátínu í herbúðum liðsins þegar í ljós kom að Ming væri fótbrotinn.