Lampard verður aldrei seldur

Jose Mourinho, stjóri Chelsea, segir að miðjumaðurinn Frank Lampard verði aldrei seldur frá ensku meisturunum og segist efast um að hann vilji taka gylliboðum Barcelona og Real Madrid á Spáni, sem vitað er að hafa augastað á landsliðsmanninum enska.

"Ég er viss um að Chelsea býður honum risasamning áður en núverandi samningur hans rennur út, sem gerir það að verkum að hann muni ljúka ferlinum hér. Ég hef enga trú á því að hann vilji fara til Barcelona, því hann elskar Chelsea og er á samningi sem ekkert annað lið getur boðið honum. Ég mundi ekki skipta Frank fyrir nokkurn annan leikmann í heiminum og frammistaða hans með Chelsea er nokkuð sem enginn annar leikmaður gæti leikið eftir," sagði Mourinho.