Gagnrýnir stuðningsmenn

Steven Gerrard var ekki ánægður með móttökurnar sem Michael Owen fékk frá nokkrum stuðningsmönnum Liverpool í leik liðsins gegn Newcastle í gær, þar sem Owen lék sinn fyrsta leik á Anfield síðan hann fór frá félaginu á sínum tíma.

Nokkrir stuðningsmanna Liverpool bauluðu á Michael Owen þegar hann var kynntur fyrir leikinn, sem Liverpool vann örugglega 2-0.

"Ég er mjög vonsvikinn með viðbrögð nokkra af stuðningsmönnum okkar í garð Owen. Hann skoraði fjölda marka fyrir félagið og ætti að vera goðsögn á Anfield. Ég held að hafi nú ekki margir baulað á hann, en að mínu mati á hann skilið að fá standandi lófatak fyrir framlag sitt til félagsins," sagði Gerrard.

Nokkrir stuðningsmenn sungu "hvar varst þú í Istanbul" og "þú hefðir átt að ganga til liðs við stórt félag" til Owen þegar hann var með boltann í leiknum og greinilegt að margir af stuðningsmönnum liðsins eru enn í fýlu við Owen fyrir að hafa ákveðið að fara frá félaginu á sínum tíma.