Stendur við gagnrýni sína á United

Roy Keane hefur gefið það út að hann standi við hvert einasta orð sem hann sagði í gagnrýni sinni á fyrrum félaga sína í Manchester United á dögunum, þegar liðið steinlá fyrir Middlesbrough 4-1. Þrumuræða Keane varð að margra mati kveikjan að því að hann fór frá United.

"Ef maður á að skilgreina 4-1 tap, þá skilgreinir maður það eins og það kemur manni fyrir sjónir. Ég horfði á myndband af leiknum með leikmönnum liðsins og þeir voru allir sammála mér. Menn hafa haldið fram allsskonar hlutum síðan ég fór frá United, en það að ég hafi lent í rimmu við félaga mína í liðinu er þvættingur. Þið getið spurt hvern sem er sem ég hef spilað með síðan ég var unglingur og ég þori að veðja að þeir geta allir fundið eitthvað jákvætt til að segja um mig," sagði Keane.