Fótbolti er karlmannsíþrótt

Michael Essien, miðjumaður Chelsea segist ekki vera grófur leikmaður en hann liggur þessa dagana undir harðri gagnrýni vegna ljótrar tæklingar á Dietmar Hamann í leiknum gegn Liverpool í Meistaradeildinni í vikunni. Essien slapp án refsingar í leiknum en UEFA endurskoðaði atvikið og hefur nú kært leikmanninn fyrir óíþróttamannslega hegðun. Essien gæti nú átt yfir höfði sér allt að þriggja leikja bann í Meistaradeildinni en Hamann var heppinn að fótbrotna ekki í tæklingunni.

"Ég er ekki ofbeldisfullur leikmaður. Ég var ekki að reyna að slasa Hamann og dómarinn skildi það. Þess vegna refsaði hann mér ekki eins og svo margir vilja að hann hefði gert." segir Essien og segir að fólk þekki sig greinilega ekki nógu vel til að trúa öðru upp á hann.

"Margir sem þekkja mig ekki halda að ég sé eitthvað óargadýr á velliunum. Ég er ekki þannig leikmaður sem reynir að fótbrjóta menn á vellinum en fótbolti er karlmannsíþrótt sem er leikin af krafti og hörku. Þetta er ekki ballett." sagði Essien í viðtali við People í dag.

Essien slapp nýlega með gult spjald fyrir svipað brot á Tal Ben Haim leikmanni Bolton. Dómarinn Rob Styles vildi breyta dómnum eftir á í rautt spjald en FIFA greip þá inn í og kom í veg fyrir það.

Essien sló á þráðinn til Hamann eftir leik liðanna í vikunni og baðst afsökunar á tæklingunni en Þjóðverjinn er ennþá með takkför og skónúmer Ghana leikmannsins á sköflungnum.