Gerði nýjan samning við Wigan

Varnarmaðurinn Pascal Chimbonda hefur undirritað nýjan fjögurra ára samning við spútniklið Wigan í ensku úrvalsdeildinni, aðeins nokkrum mánuðum eftir að hann kom til félagsins frá Bastia fyrir hálfa milljón punda.

Upprunalegur samningur Chimbonda bauð upp á að hægt væri að kaupa hann út úr samningnum, en nú hefur hann gert nýjan samning. "Mér er alveg sama hvað hver segir, ég hef aldrei kært mig um að fara frá Wigan. Okkur hefur gengið mjög vel í vetur, en það kemur mér ekkert á óvart, því allir virða þjálfarann og allir leggja mjög hart að sér á vellinum," sagði Chimbonda.